樓市出更：珀．軒開售超靜 新例後首見
股市波動令樓市雪上加霜，市場上第5個登場嘅樓盤佐敦珀．軒尋日開售。根據發展商莊士（00367）嘅成交紀錄冊資料，項目重推未即錄成交，或成新例後首個開售首日「吞蛋」樓盤。至於今日起開放現樓吸客土瓜灣港圖灣，尋日加推30伙都維持原價。
珀．軒昨日中午正式重售，不少代理到場「撈客」。
新盤市場最新動向
雖然近排發展商加速推出新樓書，但係市場上可供發售嘅新盤數量仍然偏少，計埋尋日正式重推嘅珀．軒，全港賣緊樓嘅新盤都只係啱啱好一隻手數得晒。劉Sir尋日都有落去珀．軒售樓處感受吓氣氛，中午十二點開售前，售樓處外只係聚集咗大批代理等候進場，之後雖然都有部分客戶到場參觀同查詢，但就末見即時有客入市。
珀．軒重推實呎2.3萬
莊士高級營銷策劃經理陳慶光稱，珀．軒示範單位經過少許改動，大致上同之前保持相若，剛過去周日已經開放畀人睇，市場反應令人滿意，如果尋日重推錄得成交，公司應該會即日喺網上公布，而該盤樓書推出之後，暫未收到銷售監管局提出修訂建議。呢個盤喺新例前賣咗41伙，最大手買家連購3伙，內地客比例約10至20%。至於首推50伙重售，平均實用呎價23,989元。
嘉里發展執行董事朱葉培話，公司對港圖灣信心好大，尋日首度加推30伙應市，即供平均實用呎價15,813元，維持原價，首批連加推共80伙，市值約9億元，即供平均實用呎價15,403元，今起接受認購登記，星期六進行抽籤及開售，項目現樓示範單位今起開放。
逾億元成交 歷來最靜
另戴德梁行香港董事總經理陶汝鴻話，四月份物業臨時買賣合約登記只有4,557宗（數字實際反映三月份成交量），按月跌咗35%，雖然近月登記量回升，但加息將窒礙買家入市意欲，估計第三季各月成交會跌到得4,000至5,000宗外，料下半年住宅樓價有5%跌幅，全年更加有機會跌10%，達今年初預期跌幅上限。另今季過億元嘅大額成交只係得26宗，創歷史新低，涉資僅78.5億元。
