英鎊兑美元走勢

上周美國聯儲局議息會結果，退市路線圖一出，金股匯債市均大波動，美匯指數重新抽上82.45，漲幅超過2.2%，錄得近一年最佳單周表現。

英鎊兑美元走勢

下半年美元向上趨勢未變，始終匯市係相對的，歐洲經濟雖然有機會過咗最壞時間，不過美國經濟復甦動力比歐洲強勁乃係不爭事實。

英國五月份消費物價指數按年攀升至2.7%，原因係油價藉地緣政治風險炒上。短線英鎊因通脹又升溫，而其餘數據如製造業指數同申領失業救濟金數據亦比預期好，都令短線英國再加推量寬措施的機會下降。而隨着近日英鎊由1.50抽上1.5750，預期有助壓抑未來通脹。

至於央行行長金默文最後一次議息會議紀錄，投票結果繼續係6比3，而金默文繼續支持進一步量寬。扣除佢卸任後嘅一票，暫時就只有兩位委員支持量寬，令短線英國加推量寬的機會下降。更重要嘅係七月新任行長卡尼上場，睇番佢之前言論，維持寬鬆政策的機會仍相當高，相信暫時英鎊仍未有條件大升，亦解釋咗點解下半年美元仍繼續偏強的理據所在，短線反彈，相信於1.5750已見頂，本周於1.5550期已有極大阻力，建議於1.5500進一步做淡，目標1.5320，止蝕於1.5550。