太陽日誌2013/6/25

尋日上海A股在大成交下，狂插5.3%，創下○九年八月以來單日最大跌幅，深A更誇張，一跌就6.7%。雖然上星期缸邊盛傳人行向同業市場拆出資金，內地拆息由歷史高位回落，隔夜及一星期息口，尋日分別回落2厘及1.23厘，去到6.48厘及7.31厘，但從來資金緊張，股市都難免會神經緊張，水緊的情況也開始波及內地一級債券市場，今日國家開發銀行原定發行200億人仔，三至十年期債券的計劃，尋日事先張揚會因為事故取消。

太陽日誌2013/6/25

綜合大行預測富士康業績（美元）

近期有陰謀論認為，今次是人行刻意懲戒借貸欠缺謹慎的銀行，所以先遲遲唔作出流動性管理的相應舉動，例如減存款準備金率及大幅注入流動性。上星期初，這論調查實仲說得過去，但如今連國開行發債都要Hold住，加埋尋日多間大行銷售部的即市簡訊，都話外資基金清一色從A股套現，全日有沽無買，A股才出現股災式的急挫。

造成股債市動盪，經濟不穩，今次「受罰的人」未免太多，也更加令人擔心今次半年結前的水緊情況，唔同以往銀行閂水喉等埋數咁簡單。如果今個星期水緊情況無改善，難免令人懷疑會有杰撻撻的問題跟尾。

A股股災，港股終於守唔住兩萬點關口，恒指跌449點，報19,813點，沽空佔大市成交比例13.57%，是連續第五日高於一成。指數基金盈富（02800）繼續成為空軍套戥目標，全日12.5億沽空，佔成交六成八，排首位，154隻股票創五十二周新低，836隻股票跌穿250日線，多過仲企響250日線樓上嘅737隻，意味過去一年才入市的投資者，過半數坐緊艇。五十大成交榜中，得長實（00001）及恒大（03333）兩隻唔使跌。

留意到唔少基金重倉的二三線，或者今年的outperformer都出現洗倉，濠賭股已連隊幾日，尋日保利協鑫（03800）、比亞迪（01211）、金山軟件（03888）、創維（00751）、民生銀行（01988）都被狠沽，國指及恒指都創咗今年新低，反而兩隻內銀工行（01398）及建行（00939）未跌穿上星期五低位，唔通真係還原基本步，搵番兩隻內銀股做資金避難所？

富士康料有蜜月期

智能手機代工王富士康（02038）收市發盈喜，預告六月底未經審核半年業績會錄得溢利，意味與去年同期或者去年全年2.24億及3.16億美元淨虧損比較，業績由紅字變番黑字，理由係產能及經營效率提高，以及毛利率改善所致。

尋日富士康股價跌6.7%，報3.77元，今年股價雖然無升跌，但就跑贏同期跌近一成三的恒指一大截。綜合大行估計全年賺1,873萬美元，以一間預期收入60億美元的公司，市盈率97倍無乜意思，但八月份業績曝光前，相信或者會有一段蜜月期。