隨着內地4G發牌有機會在下半年落實,中移可望再成魚缸焦點。(資料圖片)

尋日A股如同股災,滬綜指失守2,000點心理關口,短線頗大機會要下試去年低位1,949點。中央一改過去內銀有難人行必救嘅習慣,尋日中午人行更發聲明促請內銀管好流動性,看來上大人今次袖手旁觀,正係要給內銀一次小懲大戒!內地「水荒」引發兩地魚缸崩盤,傷了股民荷包唔在講,對內地經濟嘅影響有待觀察。

隨着內地4G發牌有機會在下半年落實,中移可望再成魚缸焦點。(資料圖片)

綜合分析,由於五大行年度分紅吸收約2,400億元人仔流動性,半年結銀行理財產品、超短期基金理財產品現淨贖回,金融機構槓杆率偏高下償付壓力大增,加上七月初內銀須補繳約8,000億人仔準備金,以及七月中財政存款上繳數量增加,料規模逾4,000億人仔,計計埋埋,睇怕未來兩周魚缸噩夢未完,最快要到七月中,市場流動性始有望轉穩。

空軍大把做淡藉口

另一角度睇,近月內地金融市場表現,預示了六月經濟數據難有運行,七月份公布嘅月度及上半年經濟數據,以及傳聞中重啟在即嘅A股IPO,都可以成為做淡藉口。近日「空」軍睇準形勢加沽,唔排除七月份先至係真正嘅殺戳戰場!

環顧一眾中資股板塊,弱嘅繼續弱,強嘅亦轉弱。強如科網股尋日都要倒下,金山(03888)同網龍(00777)分別跌13%及11%。強勢股也明顯轉弱,意味跌市已進入「戲肉」﹗去到呢個階段,睇股票應該唔大唔吼,皆因賭大市極度超賣下作出反彈嘅話,行最先嘅當然係啲重磅股。

中移(00941)股價由五月二十日高位86.65元,跌至六月二十一日低位74.9元,累跌13.5%,已失守去年低位。尋日收報75.95元,跌1.49%,相對恒指跌幅2.2%算係跌得少。其14日RSI喺六月十四日低見15.66後回升,如今明顯見到背馳,短線重上10日線76.75元可以抖抖氣,反彈初步阻力喺78元水平,再落下一支持就喺72.5元。

講到中移,尋日有內地傳媒報道,公司已正式啟動今年TD-LTE網絡設備招標,意味距離4G發牌之日又邁進一步,估計「十.一」前有望發牌。眾所周知,中移擬藉4G一役打場漂亮嘅翻身戰,睇目前情況,發牌之日愈行愈近,下半年中移有望再成魚缸焦點。只不過,綜合當前形勢,博短線反彈風險與回報不成正比,即使有心儀股份,只宜耐心觀察低位承接,未係出手時候。