利嘉閣廖偉強（左）反對代理在現市況減佣搶客，認為是「玉石俱焚」的做法。

政府連番出招壓市，影響私樓交投量大冧。尋日有多間地產代理行，罕有同日召開記者會齊齊唱淡樓市。利嘉閣話連月來蝕本經營，若果第三季無改善，唔排除將公司規模同人手大幅縮減三分之一。至於年初樓價睇升嘅中原，亦修訂全年樓價預測為下跌10至15%。美聯就話隨着美國有意退市，再次呼籲當局盡快研究撤招，以減低樓市「進入非常差時期」所受到嘅衝擊。

利嘉閣廖偉強（左）反對代理在現市況減佣搶客，認為是「玉石俱焚」的做法。

美聯劉嘉輝（右）稱，維持全年樓價下跌的預測。

中原黃偉雄（左）認為，下半年一手開價趨合理，個別持貨多的發展商或會減價10%。

代理行業唱淡樓市言論

利嘉閣總裁廖偉強同劉Sir講，公司每月盈利約一億元，先可以達到收支平衡。

全年交投恐創新低

但自四月推出一手新例，利嘉閣每月收益已跌至約7,000萬元，連月來蝕本經營。廖偉強話，公司目前有近3,000名員工及約230間分行，若果第三季行業生計未有改善，將會收縮三分一去自救，而政策市持續下，下半年樓價必跌無疑，估計整體樓價下跌一成，一、二手成交量分別7,000及2.6萬宗，全年整體只有5.92萬宗，或再創歷史新低。

而中原地產亦睇淡今年樓市，該行亞太區總裁黃偉雄話，公司原先預測全年二手成交價量分別為6萬宗同3,000億元，但三項印花稅措施出台，嚴重拖慢成交步伐，因此決定下調至4萬宗及2,200億元，僅高於○○至○三年樓市大衰退時每年約3.8萬宗水平；又將今年整體樓價由年初原先睇升，改為睇跌10至15%，而個別豪宅、甲級商廈同一線舖位樓價，更有機會跌兩成。

美聯轉攻學生租務

另外，美聯剛剛做咗個電話調查，有逾六成基金證券界人士睇淡今年樓市，認為全年樓價將有一成以內跌幅，而預期明年及一五年本港息率上升嘅受訪者各佔50%。

美聯劉嘉輝同劉Sir講，話美國有意退市，本港受惠環球熱錢嘅時期有可能成為過去，香港「非常時期」或變成「非常差時期」，政府有必要未雨綢繆，檢討並逐步放寬「辣招」，令正常的換樓同投資活動支持樓市，防範衝擊。該公司亦趁暑期搶攻本地同內地大學生租務市場，推出「大學生租賃考察團」，「第一擊」到將軍澳區多個屋苑睇盤。

另外，地產代理八大商會將喺七月七日，號召業界上街遊行示威，並向政府提出5項訴求。