太陽日誌

前晚美國公布的五月份ISM生產指數，意外地低過50盛衰分界，退市威脅得以暫時減退，華爾街即時鬆一口氣。前晚十年債息即市一度落番去2.1厘樓下，刺激道指抽升138點，報15,254點，奈何港股選擇性跟A股唔跟美股，恒指得3點進帳，收報22,285點，成交跌到五日新低，得550億。

太陽日誌

綜合大行預測網龍業績（人民幣）

美債息回落，近期因擔心息升而隊到阿媽都唔認得的房託基金，即刻醒神番晒，恒生房託指數升2%或者117點，報6,094點，八隻REITs反彈幅度介乎0.7至3.2%。領匯（00823）低過40元，預期息率返回4厘左右，已經開始有番些少吸引力，但假如新債王Jeffrey Gundlach預言無錯，美債息今浪高位要見2.4厘，咁似乎又唔使咁急撈底住。

到底係咪投行生意真係差，抑或分析員已經淪為對沖基金打手，近期唔少大行報告，都流行掉轉玩，再唔鍾意發掘潛質股向客戶推介，反而狙擊一堆強勢股，搵出弱點齊齊沽低搵食。個多月內，先是傳發改委減電價令電力股被洗倉，跟住係家電被指無補貼，然後又借退市陰霾隊房託。

近日，有紙股邀請分析員睇廠後，隨即被群起而攻之，維達（03331）在幾間大行唱淡毛利率未見底下，一日半時間（因尋日玩半日已拉閘）隊低一成三，收8.71元，見五十二周新低。對手恒安（01044）有紙尿片生意頂住，但兩日加埋都要跌6.7%。講到底，近期港股真係無乜新錢流入，基金塘水滾塘魚，換起貨上嚟，真係好易誤中副車。基金股已經無以前咁安全，尤其outperformer一個走避不及，隨時坐一年半載艇都未必番到家鄉。

網龍不妨小注一試

中國經濟短期缺乏亮點，勢估唔到竟令一堆科網股跑出，熱門如騰訊（00700）、金山（03888）之外，連網龍（00777）及A8（00800）閒閒地成交都過億元。供應網上及手機音樂程式的A8，去年業績見紅之後，連中資券商都唔敢亂估幾時業績逆轉，反而網龍首季業績唔錯，賺1.12億人仔，升近一倍，主要是網上遊戲收入帶動。

網龍同騰訊當然無得揮，但市場睇中阿里巴巴重組後再上市，拉動整個行業估值，自問賭性夠重兼唔嫌股價快上快落，或者可以細細注試試。