中國食品和長壽花業績表現南轅北轍，難免令人對內地食油市場產生疑問。(資料圖片)

六月首兩個交易日A股低收，但港股卻似被「點穴」，似係暴風雨前夕。炒家冇嘢好炒，翻兜流動性較高嘅手機股，TCL通訊（02618）、瑞聲（02018）、中國無線（02369）及舜宇（02382）升2至7%。阿莊始終認為，魚缸冇新錢流入係大問題，若恒指短線仍未能向上突破，10日線跌穿50日線，則技術上將確認轉弱。

中國食品和長壽花業績表現南轅北轍，難免令人對內地食油市場產生疑問。(資料圖片)

市場揣測內地將適度放寬一孩政策，青蛙王子（01259）股價二月以來由低位2.97元反覆升至上周高見6.13元，觸發獲利回吐，尋日低位見4.91元，較上周高位跌近兩成。畢竟近三個多月股價翻咗一番有多，調整只係時間問題，睇圖表50日線4.8元料有初步支持，反彈阻力喺5.35元。

中食預告盈利倒退

早前中國食品（00506）就上半年業績發盈警，主因乃旗下酒品及廚房食品業務利潤倒退。舊年上半年，中食賺4.74億元，但全年純利已降至3.82億元，可見下半年情況已轉差。喺主營業務未有大改善但比較基數較高之下，今年中期業績顯著倒退在所難免。

中央限制官員三公開支，令中食旗下酒品業務遇上「寒流」，相信年內呢瓣業務都難有大起色。至於小包裝食用油業務，今年以來市場價格波動較大，加上銷量及產品價格「雙降」，但銷售成本上升，致使毛利率惡化。去年中食廚房食品收入149億元，經營虧損2.29億元。理論上，大豆油原料價下降，可減低成本，平買平賣，但問題係內地大豆油庫存高企，要完全消化，始能體現成本下降嘅效益。

奇怪嘅係，同做食用油業務嘅長壽花（01006），今年以來股價不斷做好，尋日更創五十二周新高5.86元，收報5.82元，升4.8%。長壽花去年中期賺1.03億元（人民幣．下同），全年收入27億元，賺2.04億元（已計及火災虧損2,624萬元）。上周五長壽花首次披露麥盛資產喺場外以每股5.2港元持有公司2,900.1萬股，持股量5.51%。有大戶捧場，難怪股價咁標青。不過，究竟兩大業者經營數據南轅北轍，係一個經營得太差，抑或另一個經營得太好，筆者亦搞唔清。喺睇清楚上半年業者經營情況同下半年展望前，仲係做旁觀者最安樂。