政府連番出招遏抑樓市炒風，地產代理搵食愈來愈艱難，不少經紀轉行。（資料圖片）

近排一手新盤幾近叫停，二手買賣又唔係咁好，唔少地產代理老友都嗌晒救命話無單開，劉Sir睇見截到五月底地監局數字，原來持有個人牌照代理人數按月少咗0.4%至37,016人，係連升十個月後首見回落，換句話講，即係最少有157人喺上個月決定轉行！用上個月整體樓宇登記5,288宗統計，平均7個代理有6個開唔到單。

政府連番出招遏抑樓市炒風，地產代理搵食愈來愈艱難，不少經紀轉行。（資料圖片）

地產代理持牌人數走勢

劉Sir都估到一手新例四月底出台後，代理人數減少都係遲早嘅事，只係估唔到咁快就反映出嚟，睇番地監局資料，自舊年六月底開始，代理人數每個月都有增無減。

新例後代理爭食更激

截至今年五月底持有個人牌照代理按月少157人，未能延續過去十個月升勢，反映一手新例對代理打擊，比起辣招更甚；至於過去十個月代理人數就升咗2,314人，累升6.6%。

其實一手新例喺四月底實施，之前樓市交投都未算好慘，好似土地註冊處最新資料顯示，上月整體物業買賣登記按月增加20.5%至5,288宗（主要反映四月一手新例實施前數字），不過登記金額就減少2.4%至311億元。

期內住宅登記佔4,276宗，涉及總值約240億元，分別按月升24.8%及28.4%。

山頂南區交投減五成

以上述代理人數37,016人同整體樓宇登記5,288宗計算，即係7個代理爭1張單，而且一手新例實施出台後，嚟緊呢個月成交只會更少，競爭更加激烈。

此外，樓價愈高影響愈大嘅雙倍印花稅推出啱啱一百日，利嘉閣趙保杰話，山頂同南區豪宅交投真係一落千丈，新招推出後加埋只得18宗，總值13.93億元，比起招前大跌49%及51%，至於成交個案中，僅1宗屬內地客透過公司名義入市，另有5宗成交屬轉讓公司股份。

一向交投活躍的大潭陽明山莊都頂唔住，宗數較出招前百日大跌約73%，期內只有3宗成交。趙保杰相信，當出招威力淡化後，山頂同南區豪宅按月成交可回升到20至25宗水平，不過仍僅及以往正常約七至八成水平。