股海實戰：中國電子 炒上有理
恒指尋日喺期指結算日表現波動，成交增加。理論上，向被視為避險之選嘅REITs同公用股下跌，有可能係啲錢睇好後市轉守為攻，但睇見啲地產股咁弱，中資主要板塊亦未見有明顯嘅資金流入，咁究竟啲錢沽貨後去咗邊，係行埋一邊睇定啲，抑或大戶以震倉掩飾好倉部署，就要做事後孔明！
城鎮化令移動通訊卡及智能卡等產品需求急增，為中國電子帶來商機。（資料圖片）
尋日提及嘅威勝集團（03393）一度高見5.28元，收報5.19元，升0.7%。見大市Chok上Chok落，買貨都要審慎啲，喺威勝同中國動向（03818）之中二選一，最終揀咗威勝。科網股氣氛似未受跌市影響，網龍（00777）再創新高17.96元，收報17.6元，升6%；摩比（00947）急升13%，成交大增；相信圍繞呢類股份嘅炒作尚可持續，今日就睇睇隻強勢股中國電子（00085）。
智能卡市場需求增
中國電子乃中國最大嘅國有IT集團中國電子信息產業集團旗下唯一一家紅籌公司，主要從事集成電路設計業務，產品主要覆蓋身份證卡、社保卡、移動通信卡及電表卡等智能卡應用領域。去年公司實現收入11.55億元，按年增16%；純利增72%至1.97億元，但美中不足嘅係未有派息。隨着內地對銀行、社保、物聯網等領域嘅投入加大，內地智能卡產業整體市場規模將穩步增長，但當然，市場競爭亦日趨激烈，公司優勢在於背靠大央企，近兩年嘅業績持續改善吸引投資者目光。
本月以來，中國電子嘅交投明顯轉趨活躍，股價由月初1.1元水平起步，反覆升抵尋日高位見1.87元，單日成交股數達2,449萬元，乃近幾年鮮見嘅熱鬧場面。呢期電子股有資金流入炒作，加上此股業務確可受惠城鎮化及金融IC卡國產化趨勢，不宜小覷。
據公司剛與母公司所定嘅一三至一六年綜合服務協議來推測，相信未來數年業務可保持較快增長，而公司提出削減股份溢價及派付特別股息，相信係要為日後定期發放股息甚而發行新股集資發展業務鋪路。以大股東實際持股達71%，日後有條件藉發股集資進行併購及擴大股東基礎，股價炒上不無道理。
該股現價往績市盈率15倍，保守假設今年盈利增長三成，再以預測市盈率15至18倍計算，得出合理值範圍介乎2.15至2.5元，短線回吐喺1.6元水平有得諗。
