地政總署表示，早前有約10宗涉及「房屋」限制條款的建築圖則審批個案暫緩處理。（資料圖片）

早排終審法院對九龍城南角道舊樓重建的判決，意味部分舊樓地盤重建需要補地價，令本來已經受買家印花稅（BSD）影響的舊樓收購重建市場，更加雪上加霜。地政總署話約莫有十個有相關限制的建築圖則審批暫緩處理，而該署亦決定因應判決適當地更新作業備考，市場人士話，呢次比BSD更辣，加重發展商重建成本，舊樓收購價起碼跌一半。

地政總署表示，早前有約10宗涉及「房屋」限制條款的建築圖則審批個案暫緩處理。（資料圖片）

料受終審法院判決影響的舊樓地盤

自從兩個星期前終審法院就南角道嗰宗判決，裁定發展商要求多個地段合併興建26層高物業，有違地皮當時每個地段訂立的租契中「房屋」的規定，而當時「房屋」多為低層建築物。

九龍城深水埗最重災

好多做開舊樓併購嘅公司同發展商，心情都好忐忑，因為唔知地政總署之後會點樣處理併購嘅舊樓地盤。署方尋日同劉Sir講，佢哋會就住地契裏面有「房屋」一詞嘅重建地盤，出番份新嘅作業備考，並且會要求合併多個地段重建嘅地盤，或者要申請修訂租契條款同補地價，而判決前，已經有約莫十宗個案暫緩處理，主要喺九龍區，睇嚟呢批地盤會率先受影響。

業界人士話，今次主要受影響嘅地區係九龍城同深水埗區，起碼有八成計劃重建嘅地盤會受新安排影響，其次係何文田同港島大坑部分舊樓。有做開舊樓收購嘅發展商話，呢個決定對批咗則，但因為官司而未被地政總署審批嘅地盤唔公平，而小業主都希望藉住發展商收購舊樓嚟換新屋，改善居住環境同改造舊區，今次咁樣安排，可以話對業界嚟講一大打擊。

改建高廈隨時失預算

另外，亦有發展商講到明，之前用五千萬收購一個舊樓地盤，就係諗住可以起番二十層高物業，依家買咗番嚟只可以起番同眼見咁高嘅六、七層高物業，舊樓嘅價值即時貶低晒，收購咗嘅舊樓，可能裝修一下、執番靚嚟收租仲划算過重建。