太陽日誌

周初連彈兩日，成交奀到極，尋日藉國基會（IMF）調低中國經濟增長預測，由8%降至7.75%，淡友一句唔該，趁結算前反攻，個市由頭隊到尾，恒指跌369點，報22,554點，收市計創五月新低，最衰係跌市成交不減反增，主板637億易手。

太陽日誌

綜合大行預測TCL通訊業績（港元）

自從滙豐中國PMI跌穿50，第一季中國GDP滑落到7.7%後，睇番彭博，大行紛紛把今年中國GDP打折，中位數落到7.8%，同IMF差距唔大。尋日跌市元兇，斷估唔係IMF副總裁David Lipton幾句說話咁簡單。值得留意，前晚美股道指有近百點進帳，但高位計回番近百三點，市後解釋話獲利回吐，但筆者認為，自從聯儲局主席伯南克上星期國會答問時提出，未來幾次例會會開始研究減少買債的安排後，退市預期正全速在債市醞釀，近期美國十年債券孳息見異動，前晚抽穿三月高位2.08厘，去到2.135厘的超過一年高位，而息升預期也直接衝擊收息股，尋日領匯（00823）跌近4.2%，兩個星期高位計跌超過一成，收息股或一些負債比重高的股份，都係避一避好。

手機股再追要限注

四月份，中國新增3G用戶1,280萬，按年升77%，按月卻跌26.5%，三巨頭的淨客戶增長數字，中移（00941）565萬按月跌42.8%、聯通（00762）408萬跌5.9%、中電信（00728）307萬跌4.9%。話說四月3G上客數字雖然差成咁，但幾隻炒中國4G概念的相關股份，卻是絲毫無損，講到底，係分析員認為上客差除咗季節性因素之外，三巨頭在手機補貼上無出盡全力谷客亦有關係。

今年初經已叫昅實4G概念股，出乎意料，內地相關機構實牙實齒，話今年開展4G發牌、建設及基站測試，偏偏設備股唔得，手機股卻炒到癲。年初至今，兩隻主打手機生產商TCL通訊（02618）及中國無線（02369）累積升77%及63%，設備生產股像京信通信（02342）及中興（00763），無進帳不特止仲要跌，表現雲泥之別。除了兩隻手機股向來多基金參與，分析員慣性推介之外，真係諗唔到其他原因。

老實講，現今智能手機市場，整個供應鏈重要技術及增值部分，由幾間公司控制，就算強如聯想（00992）抑或上述兩間手機商，說穿都只係做「下欄嘢」的零部件裝嵌。綜合街外大行估TCL通訊一四年市盈率17.7倍，月初摩通報告估佢一四年賺6.03億，咁計得8倍PE，反映分析員之間的睇法落差都好大，今年揀啱題目選錯股，依家追又驚唔追又恨，但平心而論，去到現水平，只適合細細注。