內地構建智能電網帶來龐大商機，配合電子股熱炒，威勝具追貨價值。(資料圖片)

港股前日升得好地地，尋日又再發軟蹄，主要受本地地產股跌勢拖累，個別藍籌收租股股價跌逾半成，聽聞係同內地大減瑞士鐘錶進口關稅，香港鐘錶零售業競爭力受衝擊，本港黃金地區零售物業租金可能受壓，間接拖低零售物業估值有關。

內地構建智能電網帶來龐大商機，配合電子股熱炒，威勝具追貨價值。(資料圖片)

呢半個月啲低啤打值股份好似食錯藥，就如領匯（00823）及置富（00778）均已較月中高位跌逾一成；電能（00006）由上周高位80.4元回落至尋日低位見73.15元；連長建（01038）都不敵地心吸力，尋日跌3.3%收場。市傳阿里巴巴計劃喺香港掛牌，嚟緊一季資金會繼續炒作啤打值較高嘅科網股，啱啱企穩300元樓上嘅騰訊（00700），今年股價將迭創新高咁話！

新晨發力成功食胡

尋日仲講緊隻新晨（01148）收一浸貨或者會再開Turbo踩上，呢鋪果然開口中，全日高位見3.02元，成功食胡，今日會睇位轉揸早前提及投資咗阿里巴巴嘅中國動向（03818）。順帶一提，持倉中嘅中銀香港（02388）派息每股0.693元今日除淨。

眼見呢兩個月電子股表現理想，如比亞迪電子（00285）股價由四月初2.38元升到上尋日高位見4.94元；中國電子（00085）由月初1.11元起步，升至上周高位見1.74元；俊知（01300）由月初1.97元升至昨日高位3.07元；賽晶電子（00580）由月初0.53元升到上尋日以全日高位0.76元收市，不妨喺呢個板塊發掘新對象。

專做電能錶、水、燃氣及熱能錶嘅威勝集團（03393），最近兩個財政年度盈利均錄得雙位數增長，去年收入增25%至24.5億元（人民幣．下同），純利增31%至3.2億元，按年增31%，毛利率上升3個百分點至33%，除電網相關業務外，出口及非電網業務增長亦理想。三月下旬，公司取得智能電錶及數據採集終端和集中器合約合共2.4億元，同月與西門子成立的合資公司已取得營業執照，戰略合作效益值得期待。

吸引阿莊目光嘅係威勝嘅股價走勢圖顯示，近日剛剛突破今年以來喺5元關所營造嘅三頂阻力，尋日收市報5.15元（港元．下同），10日線支持處於4.92元，相信嚟緊可以迎來新升浪。憑着當炒的電子及節能環保雙概念，阿莊認為威勝具追入價值，目標直指6元大關，相等於一三及一四年度預測市盈率11倍及9.5倍，應該唔過份！