中區甲級商廈市場買賣兩閒,業主減價亦未能刺激成交增加。

政府月前打壓物業炒風,工商舖物業買賣連跌三個月。代理行估計今個月工商舖買賣約420宗,同上月比勢少逾27%,並創○九年二月後單月新低,期內金額料僅約51億元,同上月比挫近33%。代理話,中區甲級寫字樓算係最慘,料今個月尾埋數,全區買賣5宗都冇,同○八年金融海嘯後差唔多。

中區甲級商廈市場買賣兩閒,業主減價亦未能刺激成交增加。

近月工商舖買賣價量表現

睇番美聯工商舖(00459)同埋其餘代理行數據,今年二月份整體工商舖買賣加埋有約2,270宗,按月急升逾24%;不過辣招推出後,三月份成交量即時反映實況,僅錄得約1,350宗,倒跌超過40%,金額亦萎縮至只約141億元,按月急插超過25%,而四月份更進一步跌至只約580宗。

力寶摸出料「平手」

上述代理行估計,本月全月工商舖成交有機會只得420宗,而寫字樓市場睇怕只有約90宗,按月少逾12%,有代理話,期間中區甲級商廈買賣加埋唔夠5宗。

此外,啱啱有代理話,金鐘力寶中心1座低層單位平手「摸出」,原業主計埋代理佣金等開支,都唔使蝕錢,聽講成交價大約3,700萬元,呎價約1.8萬元。

工廈交投大減35%

整體商用物業買賣氣氛咁差,就連入場費相對較低嘅工廈物業都唔例外,本月全月工廈物業買賣估計料只約150宗,按月將少逾35%,其中近年廣受投資者追捧嘅東九龍區觀塘、九龍灣及新蒲崗,成個月加埋工廈買賣都冇30宗。商舖買賣成交量按月急跌,代理行預料,本月商舖買賣料只約180宗,按月少逾26%,當中以樓價在1,000萬至3,000萬元中價舖成交佔最多,比例佔約六成。

但美聯工商舖行政總裁黃漢成稱,因商用物業收租回報仍高,預料下半年起,買家會重拾入市信心。