魚缸Blogger：天虹紡織上車未遲

今年紡織股好似放紙鳶咁，股價不停破頂，其中天虹紡織（02678）至今累積升幅1.3倍，尋日即市再創10.7元的五十二周新高，收報10.6元，升逾6%，想跟炒一轉嘅話仲未怕遲。

天虹去年收入增長6.8%至73.41億元人仔，純利激增6.93倍至4.86億元人仔，原因係公司採用更加廉宜的海外棉花，而未來將會繼續考慮自建或收購其他海外生產基地，逐步實施全球化生產。另早前大和出報告叫人買，話天虹在越南廠房生產，比起內地同業有成本優勢，而且國際綿價的回升，亦有利公司盈利能力，畀佢目標價11蚊。

睇番幅圖，股價自去年十月起沿住10日線反彈，即使月內營運總裁兼執董沽貨、投資者折讓配售股份，50日線8.72元支持依然非常硬淨，加埋尋日突破保力加通道頂部10.29元，可以候低喺20日線9.47元附近上車，阻力上移至11個半。