昨日A股升至兩個月高位，帶動上星期急挫的港股反彈，恒指升238點，收22,924點，可惜成交額得五字頭，升得嚟畀人唔多穩陣的感覺。

尋日話基金純因炒落後，追捧航運、工業及煤炭等中短期業績無景的股份，同時沽電力、燃氣及家電等防守股有啲過份，話口未完即見後者反彈，出盈喜的中燃（00384）勁升6.1%，潤燃（01193）升4.7%，潤電（00836）升3.7%，華能（00902）升2.8%，新奧（02688）亦有2.1%進帳。

家電股有消息配合，創維（00751）升7.5%，TCL多媒體（01070）升6.4%及海爾電器（01169）升4.8%，事緣早排內地「樂視網」，大鑼大鼓話搵日本SHARP合作供應面板，生產60吋全高清超級網絡電視「樂視TV」，兼且只賣6,999人仔，堅的話，真係隨時飲埋傳聞明年先推網絡電視iTV的蘋果公司碗頭啖湯，芬佬見到咁抵食夾大件，怕傳統電視唔係佢手腳，先將創維同TCL隊到阿媽都唔認得。到尋日日本SHARP作出否認，樂視網A股亦都拉埋閘，兩隻內地電視股即刻報復式反彈。

二月開始，人民幣幾乎日日新高，尋日見6.1203，過去兩個月升值超過2%。傳統上，人仔強對航空股有利，不過今年有H7N9，加埋習總反貪令旅客及商務外遊減少，票價下跌，東航（00670）首季業績見紅，今年股價跌8.4%，乃三隻航空股之中最弱，計落佢536億人民幣負債中，有九成三係美元債務，人仔轉強意味債務變相減少，短期會成為死貓彈藉口，或有機會上番3至3.1元之間。

深國爆發力勝一籌

靜咗成個月，前海概念又蠢蠢欲動，中集集團（02039）及深圳國際（00152）分別升1.4及3.8%，主要係市場預期，下個月中央對前海企業稅務優惠政策出台，預先炒定這批有「國策」支持的變種地產商。深國在前海擁有38萬平方米工業地皮，計劃中會興建展銷中心、酒店及高檔公寓，分析員計過更改土地用途及地積比後，以3萬蚊呎計，價值大約240億港元，加埋其他資產，好似南玻、深航、深高速（00548）及其他公路，再扣除負債後大約為340億，以現市值176億計，仲有四成八折讓，稍高於內房股平均折讓三成，有水位可炒。

至於最近先由中遠太平洋（01199）賣番畀阿媽的中集集團，在前海擁有52.42萬平方米地皮，如果要二選一，比較前海資產以外的生意，深圳國際則較為標青，相信短期的爆發力會稍為勝過中集。