受惠內地大興土木，中國建築今年首四個月的新簽合約金額，續有理想增長，盈利前景樂觀。(資料圖片)

尋日港股終於有番啲波幅，恒指重上22,800點樓上，收報22,924點，升238.2點，成交回升至515億元，主要受惠A股回勇，滬綜指收報2,321點，升28點，深、滬兩市主板總成交達到2,469億人仔，又唔流得晒！究竟港股尋日升市係預先反映外圍股市跌唔落，抑或純粹與期指結算前嘅轉倉活動有關，阿莊都搞唔清，但有一點可以肯定嘅係，港股依舊未見有新錢流入，咁嘅話只能繼續以上落市看待。

受惠內地大興土木，中國建築今年首四個月的新簽合約金額，續有理想增長，盈利前景樂觀。(資料圖片)

阿莊100萬元投資組合

近日熱炒嘅科網股及風電股尋日要抖抖氣，醫藥及家電股開始接力。創維（00751）由月初高位6.67元插到落近日低位5元邊，累跌逾兩成，尋日反彈成交配合，首站阻力先睇5.8至6元。內地消息指，當局將對170萬人仔以上嘅豪華車徵收兩成奢侈稅，但見賣高端汽車嘅華晨（01114）股價未有因此而受壓，收報8.86元，升2.6%。其實買得起百幾二百萬一架車嘅消費者，未必志在畀多兩成稅，故銷量唔會因此有太大變化，加上呢類貴價車只佔整個汽車市場銷售嘅極少數目，故影響不大。

中燃好消息陸續有

講開華晨，其分拆嘅新晨（01148）尋日一度高見2.71元，收報2.51元，升2%，成交1.38億元，高位有沽壓係正常，畢竟類似阿莊呢類喺上市之初已上車嘅股民，等到頸長，難得見尋日踢到上2.6至2.7元，想沽貨獲利係人之常情，就睇佢食完一浸貨後可唔可以再開Turbo踩上。此外，另一持股中燃（00384）發盈喜，預計截至今年三月底止年度純利按年將顯著增長，股價收報7.96元，升6%。揸呢隻股真係幾考耐性，近期股價震倉差點被震走，阿莊一心一意等佢公布同中石化（00386）嘅戰略合作詳情，睇下月公布年度業績前後，會唔會傳來更多好消息。

受惠兩地增建房屋、大興土木嘅中國建築（03311），今年首四個月累計新簽合約額204億元，同比增長89%，相等於完成今年目標嘅51%，顯見業務發展步伐未有受到期內內地經濟增長放緩嘅影響。本月上旬，公司宣布獨資取得澳門一工程項目，合約金額達105億元，由於項目喺明年初才開工，故會納入明年嘅新合約中。咁即係話，明年公司又確認了一張大單！

中建築現價12.5元，距離五十二周高位12.72元不遠，隨着公司業務發展保持較快發展，今年新增合約額有望超標實現，盈利前景能見度高，嚟緊股價可繼續保持強勢，中線目標睇14元，相等於一三及一四年度預測市盈率20倍及15倍，支持位喺11.5元，可逢回吐收集。