北角大廈樓齡約五十四年，以兩梯八伙設計。

上世紀五、六十年代，有三幾萬元已經夠買個市區住宅單位，但依家手持三幾百萬元買個新界兩房單位都只可以話「掹掹緊」。劉Sir想講嘅係，當年買樓揸足半個世紀嘅業主，要沽貨隨時可以賺百幾倍。好似港島東區北角大廈有中層單位啱啱以550萬元易手，雖然略低市價3%，但原業主一九五九年只係用咗2.74萬元一手買入，即係升值咗接近200倍咁多，有機會係升值幅度最大住宅單位。

北角大廈樓齡約五十四年，以兩梯八伙設計。

近期轉售升值逾百倍住宅成交個案

名采策略姚雲龍同劉Sir講，啱啱成交嘅單位係北角大廈中層H室，屬三房兩廳間隔，建築/實用面積約850/635方呎，原業主早喺一九五九年三月以2.74萬元一手入市，啱啱以550萬元售出，建築/實用呎價約6,471/8,661元，即係揸咗五十四年帳面獲利547.26萬元，賺幅接近200倍。

工廈「夾」舊樓 寄望重建

姚雲龍話，北角及鰂魚涌喺一九五○、六○年代嗰時有唔少「新盤」，好似上述北角大廈、俗稱「三福」嘅幸福大廈、鴻福大廈及百福大廈等，當年兩、三萬元就有交易。佢話，呢個舊區其實無乜優點，唔少舊樓都畀工廠大廈「夾住」，而且仲有殯儀館喺附近，所以客源比較狹窄，年輕一輩好少會買呢邊舊樓，但係舊樓有優厚重建潛力。

美孚44年升值126倍

喺正北角大廈隔籬嘅吉祥大廈重建項目，上個星期新世界發展（00017）等就以1.56億元成功統一其中一幢物業業權。世紀21北山彭志偉亦話，北角華園中層C室減30萬以868萬元沽，實用呎價14,114元，創同類新高，單位喺九七年至今升值近1.9倍。

同樣有番咁上下樓齡嘅荔枝角美孚新邨，亦有一手業主沽貨賺逾126倍，美聯林海成話，屋苑1期百老滙街6號極低層C室，減價50萬至850萬元易手，建築/實用呎價約6,241/8,317元，原業主喺一九六九年一手購入單位，當時成交價僅6.675萬元，今次沽貨賺843.325萬元。