太陽日誌 2013/5/24

前晚聯儲局主席伯南克在國會發表講話,在買債話題上唔退又退,一時話唔會過早減少買債,被共和黨議員質多幾質,又話未來幾次開會可能開始討論。結果因為呢幾句說話,道指由高位狂掟兩舊,也令華爾街三大指數的走勢圖上,現穿頭破腳、惡劣到極的轉勢訊號,若然係技術走勢信徒,睇見真係要即刻清倉離場。

太陽日誌 2013/5/24

綜合大行預測特步業績(人民幣)

尋日日股亦錄得兩年前三一一地震後的最大單日跌幅,加上滙豐中國編制的四月PMI跌穿50盛衰線,恒指一跌就591點,收報22,669點,如果把夜期隊到落兩萬二邊的「傻盤」計埋數,尋日低位比周二期指收市,跌超過千一點,誇張到暈。

美國未具加息條件

唔少金融界名人認為全球央行爭相量寬,資金氾濫造成過分投機,金融市場暴升暴跌日子會出現得比以往頻繁,日股在無特別利淡消息下急瀉7%,講到底係去年十一月至今,狂升81%升過龍的後遺症,低位入市的投資者找藉口來鎖定既得利潤。

事實上,即使美國失業率回落至6.5%的退市觸發點,但在目前全球產能過剩問題持續惡化,外判成本依然低迷下,失業率要返到○七年海嘯前的4.5%樓下,難度相當大,就算聯儲局減少買債規模(近月聯儲局查實用唔盡850億美元買債上限,只是甚少人提到),也不代表有加息的條件。睇番聯邦基金利率期貨,一年半後,即一四年十月底一次議息,債商估美息脫離0至0.25厘超低息範圍的機會率,僅21.9%,當中估0.5厘及0.75厘的機會率分別是18.2%及3.7%,即係加一個quater的機會連20%都冇,央行及債商顯然擔心通縮多於對通脹復燃。

全世界搵藉口狂掟out performer,又係時候睇番啲唔願郁的入定股。特步(01368)出營運數據,指實施多項嚴謹措施針對存貨過剩問題,加上新產品推出,今年首季同店銷售與去年持平。另外,在截至四月底止的第四季度訂貨會訂單金額按年跌15%至17%,跌幅比第三季的20%稍有改善。

四月開始的股市升浪中,體育用品股都算係大落後,特步股價由四月底至今升得3%,大行估公司銷售額及盈利要跌18.2及22%,下半年至明年初業績企穩,9倍市盈率話平唔平,但預期息率6.4厘,股價應該再跌水位唔多,現價買些少等復甦都唔錯。