股海實戰：海爾電器 板塊首選
日本股、匯、債市大幅波動，加埋中國經濟數據遜預期，港股亦難逃一劫，一度低見22,605點，收報22,669點，跌2.5%，成交急增至839億元，恒生波幅指數急升12.6%，收報18.38點。執筆時，夜期開市首一分鐘曾低見22,064點，睇嚟市場恐慌情緒正急速升溫。
海爾建立了完善的售後服務及銷售物流渠道，成功擴大盈利基礎，估值因此可較同業享有溢價。(資料圖片)
阿莊100萬元投資組合
周初炒過一轉騰訊（00700），好在見上唔到310元樓上先行食胡，尋日急挫10.2元，收報282.8元，真係一額汗！係時候檢討吓組合持倉，中銀香港（02388）同上實（00363）都唔太擔心，上實尋日除淨，會繼續持有；反而隻中燃（00384）真係令人失望，短線反彈上唔番7.5元會減持一半貨；至於半新股新晨（01148），尋日逆市靠穩，考慮到嚟緊一個月仲有一批IPO上市，就揸多一陣。
獲利回吐實屬正常
魚缸剛現翻雲覆雨，冇咁快會靜止落嚟，畢竟恒指由四月中低位回升至今，累升最多2,089點或9.7%，引發一次較大型嘅獲利回吐亦屬正常。至於後市如何，一切要睇外圍變化，畢竟美國聯儲局「退市」冇先例，結果會係點冇人知，總之投資者時刻要有風險意識，自己計自己數，量力而為。
呢次調整市，家電股似乎係最先出現退潮嘅板塊。就睇兩隻電視機股，創維（00751）由月初高位6.67元，跌至尋日低位5.07元，累跌幅度近24%；TCL多媒體（01070）同期累跌最多19.5%，都真係幾甘。反觀白色家電股海爾電器（01169），同期最多僅跌約一成，現價跟本月初水平相若，股價波動相對細。
本月底到期嘅家電股補貼政策，雖暫未有後續措施，但內地持續推動城鎮化，料對家電需求起到支持作用。今年首季，海爾嘅洗衣機及熱水器業務收入同比分別增長12%及21%，而渠道綜合服務業務收入同比增長15%，佔未經審核綜合收入嘅比例達93%。換言之，公司已由傳統依賴製造及銷售收入，轉型為建立完善售後服務、品牌推廣、直銷網絡、物流以及電子商務等渠道綜合服務業務，構建持續性嘅收入基礎，這一點足以令公司拋離其他競爭對手，估值可較同業享溢價，亦較具防守性。
論其股價走勢，短期向上較大阻力喺14.3元，向下50日線支持喺12.93元。從基本因素及盈利前景角度出發，喺家電股中，海爾可繼續視為首選對象。
