北角寶馬山花園四月份錄得約4宗租務成交。(資料圖片)

近期樓價回落,連租金都受到拖累,豪宅物業更加受到外資企業員工住屋津貼縮水影響,近排租金跌勢更加劇。從地產代理嘅數據睇到,四月份全港35個指標豪宅,加權平均租金指數報126.65點,比三月份跌0.8%,出現三連跌頹勢,而且單月跌幅亦係呢三個月以來最高。

北角寶馬山花園四月份錄得約4宗租務成交。(資料圖片)

上月租金急跌屋苑

劉Sir聽利嘉閣張偉文講,豪宅租務市場步入傳統淡季,加上二手市場上不斷有一手新盤落成入伙,大量新增租盤湧現爭客,拖累租金跌幅加劇,四月份全港35個指標豪宅只錄到190宗租務成交,按月減少18%,加權平均租金指數跌到126.65點。由於受到歐美經濟欠佳同企業重組影響,外派員工房屋津貼難免被削減,相信短期內豪宅租金都仍然有下跌空間。

譽.港灣回報不足3厘

三個分區之中,以較多外資企業租客嘅港島區跌幅相對較明顯,上個月跌咗1.6%,而新界區就跌1.4%,反而九龍區就逆市升咗0.1%。上個月撇除成交質素有差異嘅單位,五大租金跌幅屋苑,有四個集中喺港島區,西半山雍景臺四月份平均建築呎租約32.9元,按月急跌6.3%,表現最慘,而北角寶馬山花園同大坑名門,亦都跌6%同5.2%,平均建築呎租約32.7與38.3元。

最近市場租盤量增,業主為求競爭願意以「筍價」租出單位。世紀21置業薈點林偉雄表示,新蒲崗譽.港灣6座高層C室,建築/實用面積973/760方呎,屬三房兩廳間隔,坐向東南方,享有郵輪碼頭海景,單位近期以月租2.15萬元租出,建築/實用呎租約22.1/28.3元,以一○年買入價約895萬元,租金回報率唔夠3厘。

用家買變租 東涌密成交

東涌藍天海岸近期都錄到一宗罕有相連單位租務成交。中原曹嘉華表示,有個業主喺一一年買入該屋苑5座高層C、D室,建築/實用面積2,217/1,645方呎,啱啱以月租4萬元租出,建築/實用呎租約18/24.3元。

由於辣招推出後,部分缺乏入市信心嘅用家,寧願由買轉租,帶動東涌區租務成交多咗,好似藍天海岸今個月暫時有約17宗租務成交,比上個月全月多21%。