魚缸Blogger：廣州藥業小注跟炒

三月推介過嘅廣州藥業（00874），眨吓眼已經由21蚊左右，升到依家30蚊水平，尋日逆市再升1.6%，收報31.5元，即市創下32.3元的五十二周新高，雖然市盈率去到51.9倍，不過小注跟炒都無妨。

廣藥首季營業收入增長62.7%至29.72億元（人民幣．下同），淨利潤增長25%至1.53億元，已佔去年全年所賺3.95億元的38.7%，值得讚好，而去年佢因為要同「加多寶」抗衝，搞到銷售費用急升九成至13.59億元，今年首季仍然高達6.35億元，比去年同期增加兩倍，但好彩仲有收入增長搭夠。

除有母公司廣藥集團撐腰外，公司有意改名廣州白雲山醫藥集團，有助反映同白雲山合併的協同效應。睇番幅圖，股價近日再度突破保力加通道頂部30.62元，短線回調若唔跌穿10日線28.31元，睇勢話唔定可以再破頂，唔大貪先睇34.5元。