Fundman睇市：大昌行 現價贏面高

尋日恒指跌59點，報22,930點，全日波幅幾乎上晝行了大半，午後得幾十點上落，完全係塘水滾塘魚格局。淡友靜靜起革命，沽空佔大市成交比例升到11.18%的近一個月高位。

高息債券大受歡迎

尋日，西班牙拍賣30.3億歐元一年期債券，三年來首次以低於1厘拍板，連四個人有一個失緊業的歐豬大債仔西班牙都得！證明成個金融系統，在美歐日澳韓都齊齊放水下根本唔缺錢。尋日中信泰富（00267）發行永續次級債券，初步指引息率9厘，聽私人銀行賓架話反應相當理想，今日特區政府唔畀人炒樓，股市又畀唔到人信心，唔少有銀之士都搵這類低評級高息企業債券泊住先，好息之徒至愛的幾隻本地REITs幾乎日日創新高。

貨幣戰爭下，多國央行或減息或量寬，連鎖反應是壓低本國匯價，日圓由年初86水平，跌到四年新低見102.15，澳紙更誇張，短短兩三星期由接近1.04水平，跌到落0.99，貶值近5%，對部分以日、澳元採購，銷售則以美元、港元結算的上市公司有利，最佳例子有賣零食的阿信屋控股公司CEC國際（00759），或者有半數零部件由日本採購的精電（00710），年初至今股價升幅驚人。

一月時，提出要（目及）實一堆受惠圓匯貶值的股份，可惜當時想法太正路，揀代理大量日本品牌汽車的大昌行（01828），年初至今股價仲要跌10.8%，走勢落後。今日睇番死因，筆者實在低估中日關係緊張對日系車在內地銷售的影響持久力，不過，大部分投資者放大了交還賓利房車在內地經銷權予廠方的因素，反而無視新增城市代理權，以及新開4S店的部署。

近期，大昌行股價跌到7元附近有跌唔落迹象，估計一二年業績已見底，或者八月公布的中期業績，毛利壓力仍在，不過仲有近三個月可以炒。近期受惠圓匯貶值的公司股價升得八八九九，相信遲早都輪到大昌行，或者怕中期業績有乜冬瓜豆腐，炒一兩個月可先避一避，但見口淡淡的分析員最差的估計也不過是一三年賺11億左右，計落市盈率11倍左右真係唔貴，現價應是贏面大、輸面相對細的入市時機。