以上實目前估值，相信今年內地房地產調控的風險因素已作反映。(資料圖片)

恒指尋日23,000點得而復失，調整繼續。呢期異動板塊炒風短癮，前日做好嘅流動通訊及資訊科技股現回吐，資金翻炒新能源股，大唐新能源（01798）、中電新能源（00735）及華電福新（00816）升幅介乎4至8%，即市跟炒真係要眼明手快！

以上實目前估值，相信今年內地房地產調控的風險因素已作反映。(資料圖片)

前日港股跌市，有指同大摩調低恒指年底目標有關，但卜架朋友飛鴿傳書提出另一個版本，話大摩最新份報告並未有改變三月份對恒指所作出嘅最牛、基本及最熊情況（Bull，Base及Bear case）估值預測，只係因應宏觀因素變化，假設內地同時針對銀行及房地產作出進取的收緊措施，加多咗一個「超級熊情況」（Super Bear case）（即預測今年恒指EPS降18%，PE8.2倍），而出現呢個情況嘅可能性僅5%，正由於加多咗一個假設，所以得出嘅平均估值略為下調而已，叫大家唔使為此自亂陣腳咁話！

基金六月後抖暑

事實上，呢期A股好似拉牛上樹，港股又缺新錢流入，咁講法港股炒上落市可能維持至六月底，等一批IPO順利登場、基金做埋半年結，之後就可能要「抖暑」了！

講到IPO，隻同仁堂國藥（08138）升到你唔信，尋日高位見10.6元，阿莊有股友六個幾上車，八個幾食胡，買嗰時被質疑咁高都追，如今卻被指咁低就沽，真係冇嘢好講！不過，炒呢類全配售新股，要限注兼膽博膽，皆因好睇公司背景同保薦人實力，呢個世界冇一本通書睇到老，千祈咪表錯情！

阿莊喺上月五日推介房託基金，當中話越秀房託中線可博上4.8元，兼收埋息，果然真係超額完成，尋日創五十二周新高4.87元，計埋上月中除息0.1278元，有跟進嘅話可以施施然食胡。

講起收息，大紅籌上海實業（00363）尋日都有好表現，股價逆市升2.3%，收報26.15元，成交股數186萬股，按日增加2.7倍。上實派發末期息每股0.58元，將於下周四除淨，睇勢又可以走一轉博財息兼收。

以上實現價計，往績市盈率僅8.2倍，息4.1厘，估值已對今年房產業務受調控措施影響，以及收費公路相關政策改變嘅風險因素作出反映。再睇技術上，本月初10日線抽穿50日線後股價升勢加快，向上主要阻力喺27至28元，26元邊小注，博收埋股息，都有得諗，支持位可參考10日線25.4元。