南區蔚峰園近期有銀主單位以3300萬元放售。（資料圖片）

買家印花稅同雙倍印花稅，對二手豪宅市場可謂當頭重擊，市況唔好嘅情況下，連已絕迹嘅銀主盤都湧出嚟。南區蔚峰園有單位由銀主以3,300萬元放售。九龍站一帶屋苑，繼兩個多月前首現天璽銀主盤後，最近又有一個尖沙咀港景峯單位放售，由於銀主普遍以市價或略高市價放盤，故暫時未聞成交。

南區蔚峰園近期有銀主單位以3300萬元放售。（資料圖片）

尖沙咀港景峯一個單位，有銀主以1600萬元放盤。（資料圖片）

近期放售的部分銀主盤

近幾年樓市暢旺，銀主盤亦由九七年後的高峰期，減至近年只得零星放盤，尤其豪宅物業更加絕少有此類放盤。代理老友同劉Sir講，近期多個豪宅區陸續有銀主盤出現。

港景峰價未算吸引

好似近一年未聞銀主盤嘅南區，啱啱有個蔚峰園A室由銀主攞出嚟放售，連車位意向價3,300萬元，以建築/實用面積約1,556/1,113方呎計，建築/實用呎價約2.12萬/2.97萬元，由於依家買家入市意欲唔係太高，相信呢個價吸引力一般。

傳統豪宅區一向以用家主導，所以銀主盤始終唔會太多，不過，新興豪宅區就可能有少少危機。聽代理老友講，九龍站一帶屋苑近呢幾個月接連出現銀主盤，繼三月時天璽星鑽璽高層E室，由銀主以約2,950萬元放售之後，近期港景峯3座一個建築/實用面積約1,050/750方呎B室，以1,600萬元放售，建築/實用呎價約1.52萬/2.13萬元，若果參考舊年第四季差唔多樓層同質素嘅單位，成交建築呎價約1.36萬元，依家放盤價唔算太吸引。

九龍站對上一次出現銀主盤，要數番舊年年中，當時有個由台灣籍業主持有，承按咗約八、九次嘅君臨天下1座單位，由銀主放售，最終去到舊年年尾先賣出，所以依家突然有兩個銀主盤出現，情況比較罕有。

鹿茵連車位叫1950萬

至於新界豪宅銀主盤都唔少，好似沙田名家匯至少有兩個同類放盤，部分曾經透過拍賣推出，但因未到價收回，新近大埔鹿茵山莊都有一個銀主盤出售，連車位叫價約1,950萬元，以建築面積約2,112方呎計，建築呎價約9,233元。劉Sir聽聞依家有啲個案銀行仲處理緊，相信嚟緊豪宅銀主盤數量會有機會增加。