股海實戰：中國機械 有勢開車
大笨象（00005）發圍，加上內地貿易數據勝預期，帶動港股再度走高，恒指全日曾高見23,270點，收報23,244點，升197點，全日波幅114點，成交增至650億元。不過阿莊都係相信，後市能唔能夠更上層樓，要睇阿爺面色。但補充一句，要留意基金喺高位嘅轉倉活動，個別已炒過龍嘅板塊，嚟緊波動會明顯擴大。
相比其他從事基建工程承包業務的同業，中國機械勝在估值不高兼息率吸引。（資料圖片）
尋日家電股就係一個好例子，查實月底電視機補貼政策結束後未有後續政策經已唔係新聞，偏偏呢兩日兩隻電視股創維（00751）同TCL多媒體（01070）先至被人洗倉，二者昨日分別跌12%及9%，成交大增，想博反彈真係要三思！
重機股全線異動
誠如阿莊尋日所言，大戶開始轉炒低PB嘅落後中資股。摩通報告話內地挖掘機總銷售量持續復甦，估值低迷嘅重型機械股即刻有反應，中聯重科（01157）同三一國際（00631）分別升6.4%及3.7%。連日成交增加嘅中國龍工（03339），尋日亦踢穿50日線，惟升至接近250日線有獲利回吐，收報1.72元，升2.9%。
除咗重機製造股有異動之外，專門做國際工程承包及機構進出口貿易等業務的中國機械工程（01829），尋日高位見6.2元，收報6.19元，升5.8%，成交7,584萬元。呢隻股喺舊年十二月先掛牌，招股價5.4元，今年一月最高見過7.61元，四月初最低見過5.34元。由於嚟緊有多隻新股掛牌，前日掛牌嘅同仁堂國藥（08138）喪炒上8.66元，睇嚟遲早去到翻炒半新股，咁睇落中國機械亦有得諗！
去年，中國機械實現收入212億元人仔，按年增長3.8%；純利19.28億元人仔，增長30.7%。截至去年底，其手頭未完成合同量71億美元，按年增33%。值得留意，同其他從事基建工程承包嘅股份相比，中國機械嘅息率唔錯，有3.3厘，且現價市盈率8.5倍，估值唔係貴。再講，扣咗社保同幾個基金嘅持貨，呢隻股都幾「乾身」，收咗兩個月貨，隨時又可成翻炒對象。尋日股價突破50日線，成交明顯增加，話唔定係開車訊號，呢轉目標踢番上三月上旬嘅7元水平，支持位5.85元。
