樓市出更：中區甲廈 驚現頂租潮
各國經濟表現麻麻，唔少公司都盡量減低租金開支，劉Sir收到風，中區近排罕有咁開始有甲級寫字樓單位頂租放盤。代理話，○八年金融海嘯初期，該區都無見到甲級寫字樓有頂租，其中金鐘遠東金融中心有個中層單位，租期年底先到，金融機構租客嗌頂租，意向月租13.8萬元，同早年簽落嘅現有租金差唔多，即係變相減租。
遠東金融中心罕現頂租盤，意向呎租約60元。（資料圖片）
中區甲級寫字樓頂租放盤個案
舊年唔少大型財金機構為每月慳過百萬元龐大租金，已經開始將現租用中區超甲級寫字樓部分或全部樓面頂租，而中區甲級寫字樓租戶月租開支只約數萬至十多萬元，但由於經濟氣氛差，竟然都有唔少租戶推出單位頂租，依家中區已數到有約四個呢類放租盤。
美銀呎租50 加幅忍手
有代理對劉Sir講，情況極不尋常。有消息話，依家遠東金融中心放租盤只係有10個，但都有一個中層單位金融機構租客為求搶客，將單位提出頂租，意向月租約13.8萬元，面積約2,300方呎，呎租約60元，同現租金相同，依家啲租金已經升咗，咁即係變相減租。
歐洲經濟麻麻，租用同區美國銀行中心低層單位嘅歐洲金融公司，租期下季屆滿前，急急將單位推出頂租，意向月租約7.5萬元，呎租約50元，比依家月租只調高約6%，較該大廈舊年租金平均升幅約10%，明顯是求客為先。
信德單位 中資嗌貴30%
內地經濟增長開始軟着陸，代理爆料，有中資機構月前續租上環信德中心西翼低層單位，依家提出將單位頂租，意向月租約17.6萬元，呎租達約55元，比該廈依家成交呎租高出約30%，估計上址可承接呎租約44元，開價明顯過於進取。
經濟活動轉放慢，資訊科技服務需求都少咗，所以依家租用上環安泰金融中心中層嘅科技公司，都嗌頂租，意向月租約29.6萬元，呎租約37元，較現租調升約12%。
另一方面，代理就提醒大家，舊租客咪以為成功頂租就可以走，若果新租嘅租金比舊租平，舊租客就須補償當中差價，至於金額多少就按舊租約剩番幾多而定，同時要幫業主畀埋新租約代理佣金。
