A股自二月中旬起回落，券商股就跟住霉足咁耐，上周五受RQFII嘅消息帶動，一眾券商股終於突圍，其中隻國泰君安（01788）急升7.2%，以接近全日高位3.41元收市，成功升穿100日線3.34元阻力，配合短線黃金交叉利好，相信隨時會再度開車，可以(目及)實。

國泰君安係內地最大證券公司之一，早前更獲全國社保基金以每股2.2元入股，去年純利增長6.7%至3.07億元，全靠去年下半年美國推出OMT（直接貨幣交易購債計劃）同QE3，令市場表現及成交額回升。睇番上周五爆上原因，除RQFII試點辦法實施細則落實外，有傳暫停咗兩個幾月的RQFII額度審批即將開閘，有望增加A股反彈嘅動力。查實近期都有唔少利好消息，如內地居住港澳居民可以開立A股帳戶、MSCI新興市場指數研究納入A股等。另外，國泰君安早前亦已提出5億美元的QFII額度申請，而母公司擬於本月啟動A股上市申報程序，如果定價理想，其股價應可受惠。