恒指期貨走勢

上周歐洲減息，加上美國新申領失業救濟人數跌至五年新低，上周五港股早市係威係勢，一度高見22,886點的三月中以來高位，不過大市成交唔配合，高位承接力始終唔夠，結果淡友稍為主動，已成功炮製出超短線大市雙頂局面，恒指收市升幅收窄到21點，報22,689點，較即市高位低197點，即月期指以接近全日低位收市，報22,551點，成交6.29萬張，與除息後合理值近乎平水。

恒指期貨走勢

中線而言，港股自四月中開始由低位21,423點升至22,886點，反彈1,463點，幅度話少唔少，尤其期間中國官方及滙豐編制的製造業PMI數據，雙雙差過市場預期，顯示內地經濟復甦動力麻麻，也令到港股今浪升市，或多或少沾上挾淡倉的味道。不過，上周五晚美國非農就業數據優於預期，令美國道指一度衝破歷史性新高15,000點關，則增加了今日港股高開的機會。

策略上，結算前把好倉平掉，一直等再入市機會，但見現貨升穿22,527點後，遲遲未有調整，現貨及期指成交卻在減少，使筆者即市開好倉意欲減低。上周提到，周四滬綜指跌穿2,165點五個月新低，不過9日RSI呈現底背馳，周五已重返2,200點關口，升1.4%，報2,205點，但要真正轉勢，扭轉二月初跌浪，關鍵會係四月中高位阻力2,250點。