太陽日誌

上周美國公布新申領失業救濟金人數創近四年新低，道指歷史上首次升破萬五點關口。由港股ADR表現及期指夜市做好估計，今日港股早市很有機會見22,900至23,000點水平。不過中線而言，四月份港股殺淡倉氣勢能否延續到五月份，始終要睇外圍大氣候。目下，不少中資股估值已處於歷史中下檔水平，最近內地製造業PMI數據一般，然而中港兩地股市已經開始不受影響，因此五月個市真係唔需要睇得太淡。

太陽日誌

證券行對中石化冠德之預測

最近分拆酒店上市成風，鷹君（00041）及盛傳的合和（00054）之外，上星期新世界（00017）表示計劃把香港三間酒店──君悅、萬麗海景及尖沙咀凱悅以合訂形式分拆上市，集資額估計介乎8億至10億美元，上市後保留多於五成股權。在眾多本地地產股之中，新世界未必係經營得最好的一間，不過彤叔每次動作，尤其增持或者分拆業務上市，時機掌握的確無懈可擊。單係一一年底，趁個人遊消費力未開始減弱，以15元招股價將珠寶旗艦周大福（01929）上市，之後一直潛水。如今又作出分拆酒店的決定，令人懷疑過去幾年依賴內地遊客推動的本地酒店生意，可能已經或即將在不久的日子，從高峰回落。

被視為中石化（00386）系明日之「升」的中石化冠德（00934），上周以每股6.5元配售4.125億股，較市價折讓5%，集資26.8億元，批完之後股價唔散不特止，上周五更倒升0.31元，收報7.15元，接到貨的即日有一成利潤。

冠德收購陸續有來

冠德被欽點為系內油品儲運窗口，股價從年多前的2元，到現時翻了兩番，市場賭的，係市值7,600億元的中石化，大過冠德50倍有多，即使讓出手指尾咁大的項目，注入冠德已足夠令到佢快高長大，呢個亦係去年賺不到3億元的冠德，可以擁有近148億元市值的原因。

冠德係唔少中資基金愛股，最難明嘅係中石化系內靚資產多的是，偏偏冠德揀了走出去，未來12至18個月增長，清一色來自海外收購，包括富渣伊拉港、巴淡及VESTA三個倉儲項目，新幾內亞及澳洲的LNG運輸項目，按估值冠德近19倍唔平，但由投機角度出發，集資後意味向阿媽買嘢機會大增，加上批唔散，顯見貨源落在強者手上，短期要留意。