股海實戰：新世界　有力跑出

內地經濟正在轉型，為堅持到底，中央未有放鬆銀根，正回購沒有停止過，針對內銀同內房嘅調控措施亦繼續。正所謂「長痛不如短痛」，眼前A股嘅低迷正為長遠增長作更佳準備。喺呢個過渡期內，投資者宜多花心神分析個股，把握機會投資受惠經濟轉型嘅股份，如節能環保、電子商貿、移動通訊及互聯網股等等。早喺三月初及中旬本欄推介過嘅光大國際（00257）及金山軟件（03888）都係好例子，當時光國股價才剛突破5元關，金山股價尚未突破7元關，如今眨眼股價分別升越6元關及9元關。三月份短炒光國一轉獲利，如今睇見其破位後未有大回，又心思思再上車，周內喺6元邊會見機行事。

IPO熱潮利後市

港股走勢有改善，一直按兵不動嘅大企業家把握時機，紛紛啟動抽水大計，分拆又漸成潮流。除合和（00054）擬分拆香港地產業務，鷹君（00041）及新世界發展（00017）擬分拆酒店業務外，凱雷旗下內地第三大酒店連鎖集團世界酒店集團亦想湊熱鬧以房產信託基金形成在港上市，另傳中石化煉化工程同銀河證券亦擬啟動在港上市計劃，由於多喺六月或之後行事，且集資規模都唔細，經驗顯示，除非外圍風向突然轉變，否則咁多IPO活動進行期間，一般而言魚缸氣氛會趨於穩定，亦令人未敢過分睇淡後市表現。

講番新世界，阿莊相信，除咗分拆酒店業務外，未來集團會繼續整合資產，務求更有效體現本身嘅資產價值。花旗證券就估計，新世界旗下酒店業務約值每股1.9元，分拆行動料可帶來逾40億元現金回籠，另日後酒店業務每年可帶來穩定嘅股息收入（參考同類嘅富豪產業（01881）同帝盛酒店（02266）現價息率約5至6厘）。此外，撇除上市資產，現時新世界的非上市資產現價估值較NAV折讓六成多，隨着以市價分拆酒店業務計劃順利推行，應有助收窄資產折讓率。

還有，未來集團加快更改農地用途，以及新世界中心重建，均有利提升資產價值。環顧幾隻龍頭地產股，似乎目前以新世界發展最朝氣勃勃，正所謂「時來運到」，未來股價表現可望跑贏同類股，值得長線投資者翹首以待。