施弼街有地舖業主睇好收租回報，決定轉售為租。

近年鄰近維園的大坑一帶，吸引不少外區特色食肆，並早已「攻陷」浣紗街地舖，個別舖位呎租搶貴至過百元，租金亦倍升，唔少畀貴租嚇怕嘅小商戶，索性搬到附近租金低約兩、三成嘅施弼街及書館街，依家成交呎租約50至60餘元，新進駐嘅租戶唔少係賣紅酒或中檔食肆等，所佔比例高達三成。

施弼街有地舖業主睇好收租回報，決定轉售為租。

大坑區街坊Kevin表示，區內地舖租金相對中環及銅鑼灣低，故能吸引不少食肆進駐。

過去八、九年間，浣紗街街舖大變天，昔日滿街都係車房及菜檔等為主，近幾年已換上各國特色食肆。有代理同劉Sir講，該街道商舖數目差唔多有30間，其中一個單號地舖由意大利餐廳租緊，月租約8萬元，呎租約100元，較之前租金高約一倍。

施弼書館街租平30%

依家條街有三個交吉地舖招租，其中有個雙號地舖吉咗約一個月，業主月租「企硬」叫約9萬元，呎租近130元。

雖然浣紗街有吉舖可以揀，但業主叫價咁「辣」，唔少準租戶都轉到附近施弼街同埋書館街等「橫街」，最主要係嗰兩條街近住浣紗街，但租金低約兩、三成。施弼街同埋書館街地舖數目均各約10餘個，紅酒及中檔食肆等新進駐租戶比例佔約三成，但同兩年幾前條街清一色係車房、菜檔及肉檔等明顯唔同晒。

一年前選址大坑售賣紅酒及芝士嘅「初哥」盧先生話，「揀大坑開業主因係有潛質成為第二個蘭桂坊，舊年都有喺浣紗街搵舖，面積約400方呎，但業主獅子開大口，意向月租近6萬元，呎租約150元，最後轉租施弼街雙號一個面積相若地舖，月租只係約3.6萬元，相對低近四成。」

業主售轉租回報4厘

施弼街地舖租盤搶手，加上收租回報率達4厘，中原（工商舖）黃先生話，該街道一個單號地舖及閣樓原先放售，意向價約3,600萬元，業主上月決定唔賣，依家意向月租約6.6萬元，好快就收到兩組來自尖沙咀諾士佛臺嘅餐廳洽租。大坑街舖大變遷，唔少街坊都「like」，區內嘅住客Kevin話，「大坑街舖食肆選擇多，放假食飯唔使去銅鑼灣及中環爭位。」