期指攻略：企穩22177 再諗開好倉

在印鈔政策的威力下，美日股市近日吸引環球資金目光，相反，基金對中國概念的興趣則是每況愈下，由成交額可見，上星期A股兩市成交是一日低於一日，港股殊途同歸，成交額從周初580億，跌到周五僅僅500億元，即使全星期恒數累積362點進帳，但就畀人相當唔穩陣、中期調整未完的主觀感覺。

技術上，星期四、五，大市都曾經一度逼近20日線，但收市唔單止未能成功突圍（周五在22,200點，即市高位22,185點），反而一連兩日高開低收，收市價低於10日線樓下，淡友已從周初的劣勢中重掌主導權，由恒指23,944點高位延伸出下降軌道，約在22,500點附近，也將會是由21,612點開始反彈的真正考驗，如果仍傾向開好倉，至少等現貨指數收市企穩22,162及22,177點樓上（即23,944至21,612點的0.236反彈，及22,527至21,612的0.618反彈）先好諗。

開波五日的港期夜市，觀察幾日，成交只及日間的1至2%，受觀迎與否見仁見智！交易去到十一點，如果因應美股早段市況，感覺係唔湯唔水，不如直接買賣標普或者納指期貨，至少在十一點後，睇錯都仲有止蝕離場機會。