Fundman睇市：華晨現價估值吸引

睇住美股日日升，惟中港兩地股市就好似食咗兩擔豬油一樣，近排心理真係好唔平衡。伯南克與黑田東彥在美日施以無限量寬，即刻令到兩國股市好似變咗吸金大象一樣，年初至今，已分別累積380億及109億美元的淨流入，佔基金流入已發展股市總量的六成三。

有故事配合，加埋股市深度足夠，新興市場難免被環球基金冷落，中國股市連續五周淨流出，與巴西同俄羅斯等新興市場齊齊變成基金提款機，睇嚟一頭半個月內趨勢唔易逆轉，陰陰乾情況可能持續。睇番港股過去兩年的低點，分別約在萬六及萬八點左右，最壞打算，今次浪底可能在兩萬點附近。

夜期時段唔湯唔水

期指夜市開咗啱啱一星期，史提芬無參與過，主要原因係十一點收市感覺難玩。好似上周五，美國早市因為零售及消費信心數據差過預期，隊過七十幾點。咁啱係十點幾時段，夜市港期見勢色唔對，居然要跌190點收市，比ADR推算出來的跌幅更大，如果追沽，之後見道指收市拗腰上番去，逃生無門仲肯定嘔血，如果真係手痕要賭夜市，勸大家開番個美期戶口好過，至少去或留彈性大好多。

上周，中汽協公布三月份內地汽車產銷數字相當唔錯，分別為208.5萬輛及203.5萬輛，增長超過一成，創歷史新高，亦比市場預期好，支持汽車股由近日低位反彈。

幾隻車股中，不妨留意吓華晨汽車（01114），早前股價由10元樓上，四日內隊落8.5元，有段傳聞話，業績發布後管理層同基金經理會面，在新一年固定投資數字上有點誤會，加埋市況麻麻，引發一輪拋售。睇番業績，華晨盈利23億元人仔，升27%，同預期相若，市場焦點係與德國寶馬的合資項目貢獻增加32%，至24.34億元人仔，稍高過市場估計。公布業績後急跌另一個原因，係市場憂慮中央肅貪下，寶馬等豪華車銷售會受影響，但按管理層目標，今年寶馬產銷量20萬輛，按年增加兩成，以今年無新車型推出下，這程度的增長其實相當唔錯。

不過，芬佬要雞蛋裏挑骨頭都無計。華晨去年十一月起步位係8.6元，業績後見8.5元後反彈，短期低位應該見咗，以今明兩年維持兩至三成盈利增長，目前市盈率12.5倍唔貴，無乜其他心水，不妨留意。