股海實戰：PC股 毋須睇太淡

滬綜指喺清明長假後連續兩周企穩2,200點水平，市場關注匯金何時啟動第五輪增持內銀股，上周亦有聽聞中資盤喺低位吸納內銀及內險股。但無論如何，睇上周五港股成交降到得番500億元，買賣兩閒，睇怕低迷情況唔會係一頭半個月就有改善，要有心理準備成個第二季都要捱淡市。

上周五跌幅榜中排首位係就去年度業績發盈警嘅現代美容（00919）。翻查資料，該股前年度賺緊8,000多萬元，而截至去年九月底止半年純利4,378萬元，同比增長24%。若然去年度真係轉盈為虧，都真係幾惡劣。事實上，去年有市民因接受醫學美容而命喪之後，市場關注相關安全，整個行業都受負面影響。面對同業競爭激烈，且監管趨嚴之下，生意唔易做，唔少業者都轉移北上或到東南亞地區搵食。呢十年八載不乏美容修身服務公司上市，但整個板塊始終唔成氣候，個股交投淡靜。現代美容平日交投唔多，上周五股價單日大成交急挫，唔排除有長坐基金沽貨，短線有技術性反彈唔出奇，但睇唔通盈利前景，都係無謂多手。

另一隻上周股價大幅波動而又值得一提嘅係藍籌股聯想（00992），事緣IDC數據顯示，截至今年三月底止季度（一二/一三年度末季），聯想嘅個人電腦付運量按季跌17%，較市場預期嘅按季跌幅15%遜色，唔少大行出報告調低其盈利預測，花旗更將其目標價降至6.5元。不過，阿莊就認為，投資者唔應該一味睇銷量增長。好似去年，內地五大電力股嘅售電量僅錄得低單位數增長或負增長，但卻全線錄得盈利，相信今年鋼鐵股亦會出現類似去年電力股嘅情況，即係做少啲，業績反而有改善，箇中玄機係成本因素以至毛利率表現比銷量增長更重要。

聯想6元邊可撈貨

講番聯想，其實全球電子消費並沒有扭轉增長形勢，只係個人電腦銷售部分已轉移至手提電腦、平板電腦同智能手機市場，聯想近年亦積極發展平板電腦同智能手機等業務，所以單睇個人電腦數據就睇淡盈利前景，未免有點武斷。

以現價計，一一/一二年度市盈率18倍，一二/一三年度首三季純利已較前年度全年盈利高出7.6%，意味一二/一三年度盈利增長兩成應無難度，即使保守假設一三/一四年度盈利按年僅平穩，現價預測市盈率約14.5倍。預料本輪調整，預測市盈率落到12倍左右，估值中長線可再現吸引力，不妨等落番6元邊先至諗撈貨，至於風險因素則包括手機及平板電腦銷情或遜預期。