樓市出更：坪洲樓價 暗中起動

本港住宅樓價及地價連年上升，只有部分離島地區如坪洲地價仍然遠低於市場，近年吸引發展商爭搶，舊年坪洲罕有地有4幅住宅地皮賣咗，財團出價仲好勇，其中，信置（00083）以3,100萬元奪得嘅東灣B地盤，每方呎樓面地價2,157元，拍得住島上新起嘅住宅呎價，市場估計，該盤日後實用面積呎價有機會挑戰萬元水平，到時可能會掀動該「小島」住宅呎價升浪。

卓威物業梁曦文話，坪洲嘅住宅租售市場，主要係舊式嘅兩、三層高石屋、新建樓齡十多年嘅私人住宅，以及居屋坪麗苑，同埋公共屋邨金坪邨。有代理同劉Sir講，靠近坪洲碼頭嘅嘉暉花園，九七年嗰陣一手呎價4,000幾元，近排屋苑一個中層單位賣118萬元，建築呎價近3,000元。

用家天下交投零星

由於唔少業主都係自用，所以每個月買賣成交只維持約兩至三宗。有喺坪洲住咗十幾年嘅岑先生話，「○三年沙士嗰陣，島上一個300餘方呎地下住宅單位，只係賣十幾萬，近幾年樓價升幅以倍數計」。租住坪洲公屋十幾年嘅陳小姐又話，「都有諗過島上私樓樓價愈來愈貴，如果買樓，會考慮返市區。」

新盤實呎料賣萬元

舊年坪洲成功吸引大型發展商、物業投資者，同埋中型企業搶地；其中，信置先後連奪該島兩幅住宅地，繼去年初先以約1,900萬元、每方呎樓面地價僅約516元，購得坪利路一幅住宅地後，舊年九月再奪東灣B地盤，成交價約3,100萬元，每方呎樓面地價已升至約2,157元，呎價係島上新高，市場估計日後落成，實用面積計，呎價可挑戰萬元。

同年，島上坪利路一幅罕有商住地，出乎意料收到8份標書，最終由投資者盧華奪得，佢個夥計話，項目總投資1.5億元，會起70多個住宅單位，實用面積約300方呎起。市場料日後實用面積呎價達8,000元。