股海實戰：新能源股 值博率高

尋日大部分時間恒指反彈受制於22,000點，誰知臨尾市有買盤掃內銀內險股，恒指順利重越22,000點，收報22,034點，升164點，但成交變化不大，僅594億元。若然周初冇參與博短線反彈，呢啲位唔做唔錯。新能源及環保概念股繼續成為炒家樂園，繼風電股及頁岩氣股後，尋日燃氣股同光伏股亦有炒味，但炒作股神入股尚德嘅消息虛虛地，光伏股基本面始終未見大起色，沾手只宜抱短炒心態，Set定止賺止蝕嚟玩！

投資也有潮流，好似上世紀九十年代，紅籌股成股民熱捧對象，仲好記得排隊認購北控（00392）IPO嘅經典場面，但經過金融風暴洗禮後紅籌股失寵，雖然現時唔少已透過資產重組重獲投資者青睞，但熱情難與當年比較。再睇十多年前被視為穩陣收息股嘅公路股，係基金愛股，但今時今日限車令、假日免收、高鐵通車等多項因素，已令公路股投資價值今非昔比。

向來順應國策係投資中資股嘅不二之法，投資者亦宜緊貼潮流，相信未來十年，節能環保概念板塊會係股民尋寶之地，但當然，新興產業嘅投資風險不低，也許幾隻有傳統國家電企支持嘅新能源股相對值博，而風電股又比光伏股穩陣。

異動股方面，尋日見隻億和控股（00838）升8%收市，報1.29元，成交增至3,924萬元。阿莊一向有留意呢隻工業股，對上一次推介喺去年十一月底，當時叫人喺1元或樓下可收集，結果之後股價一直反覆回升，即使去年業績倒退，全年純利跌六成多至7,088萬元，但股價亦未見大回，相信已頗大程度反映利淡因素。

億和可中長線收集

雖然去年盈利大跌，但仍較○九年度金融海嘯時僅賺3,000多萬元為佳，且一直維持相對穩定嘅派息比率。至於日本加大量化力度刺激經濟，由於公司大部分銷售及生產成本均以港元及美元為單位，日圓貶值對其成本影響有限，若然日本嘅刺激經濟奏效，由於其自助化辦公室設備主要為日本客戶，料可帶動訂單需求。

去年下半年，億和嘅模具業務已見改善，預視今年零部件及半製成品產量可逐步增加。此外，近兩年公司投資嘅武漢汽車零部件項目，預計今年中竣工，將成為盈利新增長點，加上公司財務狀況維持穩健，去年存貨周轉日及應收帳款周轉日均有所下降，經營活動現金流1.8億元，截至去年底止手頭現金等值逾8億元，相信公司已安度最壞時刻，未來數年多元化業務策略將漸見成效。雖然現價已較去年推介時高出兩成，但中長線估值仍具吸引力，尋日股價異動不排除係有基金或現有股東大手增持，維持建議逢低作中長線收集。