樓市出更：工商舖濕滯 大刁縮九成

政府出招規定工商舖交易要畀雙倍印花稅，買賣即時急跌；有代理話，上季整個工商舖買賣只5,436宗，按季少16%，總值不足531億元，按季跌13%，當中過億元買賣跌勢最急，三月份僅6宗，成交額約8.6億元，金額按月大插水逾91%。有代理行估計，若情況無改善，睇怕兩成工商舖前線員工要執包袱。

美聯工商舖（00459）行政總裁黃漢成（Daniel）呻住話，政府出招後預咗工商舖買賣會靜，上季最慘情係工廈物業，全季2,400宗唔夠，按季跌逾32%。家陣準買家還價好狼，每每要劈20%，業主點肯就範，所以拉鋸明顯，料本季整體工商舖成交量再跌一半，約2,400宗左右。

代理籲放寬按揭成數

Daniel同劉Sir講，佢哋公司暫時未有同事大規模自然流失，不過，市場僧多粥少將愈趨明顯，難以養活近8,000人。為業界着想，佢提出5項建議，包括寬免地產代理牌費一年，放寬按揭成數至五成，同時豁免持貨兩年以上業主可退回雙倍印花稅等。

二月底公布嘅辣招，對成交金額愈大的物業影響最深。睇番韋堅信測量師行同其他代理行數據，上個月逾億元工商舖物業買賣只有6宗，總值僅約8.6億元，按月跌逾91%，拖累整個季度同類大額買賣只有179億元，按年同期僅多約10%。

今年首季最勁嘅大刁係南豐或有關人士賣咗旺角亞皆老街113號全幢商廈，成交價約29億元，係九龍區歷來最大單宗買賣。

湯君明：最壞時候未到

該行物業發展及投資董事許偉國話，雙倍印花稅大大增加入市成本，搞到成個樓市買賣交投氣氛靜晒，佢相信未來幾個月買賣仲有排靜。科達地產主席湯君明就話，樓市最壞時候未到，依家仲未係「撈底」好時機，睇怕呢季大刁成交仍然淡靜。

美聯旺舖董事盧展豪話，部署下周原價重售嘅荃灣地皇廣場約11個撻訂「劏舖」，業主尹柏權或有關人士會向該批店舖新買家附送全數印花稅開支，相當於樓價5%以內。