股海實戰：執平貨 要量力而為

內地禽流感疫情震散港股，上周五恒指急挫610點，國指亦跌329點，睇怕今日A股復市難免一跌，滬綜指頗大機會跌穿250日線2,216點。咁啱本周起港股夜期啟市，唔排除港股會變得波濤洶湧，看官宜緊握扶手，持貨唔多最好戒急用忍，耐心等候次季低位出現。

上周阿莊話大市氣氛唔好，防守股抬頭，房託基金可以視為避險之選，提及過嘅置富產業信託（00778）上周五收報6.92元，微跌0.29%，算係跑贏大市；另一隻越秀房託（00405）則跌2%，收報4.27元，畢竟主要物業組合處於內地，但相信以其息率高達8厘，只要內地疫情受控，其估值對好息之徒有一定嘅吸引力。此外，組合中嘅新晨動力（01148）未有及時逃生，且看本周是否有機會反彈上2.2元樓上減磅，另重申若京能（00579）股價失守2.2元會先行沽出。

面對大跌市，唔少缸邊友喺度講「秋官」效應，又話Sell In May提前一個月出現，但阿莊覺得呢啲都係搵嚟講。首季恒指見高位後回落，走勢轉弱經已有一排，大市唔係升就跌，次季尋底走勢可以話係有晒心理準備，內地禽流感疫情、地緣政治或歐債危機都只不過係淡友做嘢嘅藉口，宜用平常心看待股市調整。阿莊估計，次季恒指有機一試250日線21,068點支持，並會喺低位徘徊一段時間，期間除咗高息股之外，跟傳統經濟關係不大的新能源及環保股等，表現亦有望跑贏大市。至於醫藥股，也許可以喺疫情期間成為投機對象，但缸邊友亦宜注意風險，慎選對象，量力而為。

Yen跌概念受追捧

索羅斯現身香港，更公開評論日本央行放水，日圓跌勢將如「雪崩」。講到日圓貶值概念，來來去去得隻CEC國際（00759）比較好炒，上周五大市急挫，其股價卻逆市升7.8%，收報1.1元，成交達到3,353萬元，睇走勢向上主要阻力喺二月高位1.28元，回吐未宜失守1.02元。

至於零售商I.T（00999）同永旺（00984），都係從日本進口產品銷售，日圓貶值照計有助降低入貨成本，但I.T存貨高令人擔憂，永旺交投疏落乏炒味。炒得概念股都係高風險動作，上車前要諗定點落車，正路即市邊隻交投旺就跟邊隻；那些股份交投唔活躍、走勢低迷嘅，弱勢總有其原因，亦無謂花錢去尋找答案！