樓市出更：海防道舖 賣珠寶惡哂

近幾年內地旅客多咗行尖沙咀海防道，所以唔少專吸「北水」、承租力強嘅商戶進駐，過去一年，繼便利店同找換店被鐘錶珠寶店踢走後，原租用該街約十年嘅地道小食店及甜品店都喺今年三月內先後交吉撤出，依家連鎖鐘錶、鞋店同藥房數目已佔該街道七成有多，正式轉型為「內地人購物專區」。目前海防道地舖平均呎租超過1,200元，兩年間升逾五成，較毗鄰嘅廣東道舖租只低約三成。

尖沙咀係內地旅客來港血拼熱門地之一，但核心零售街舖供不應求，高價消費品店轉而搶租毗鄰街舖，唔少地道老店都被「叮走」。劉Sir發現，依家海防道地舖約有30多個，當中連鎖鐘錶及珠寶金行店數目最多，大約有10多間，佔去三成，連鎖時尚鞋店數目亦差唔多有10間。

珠寶店高一倍搶租

大鴻輝興業嘅海防道同漢口道交界一批單邊地舖，原由便利店及找換店等租用，舊年年中畀珠寶店以每月約260萬元一併租用，呎租1,800多元。

來自四川成都嘅內地旅客鄧小姐話，「海防道近幾年開始出名，原因條街係前往廣東道最方便嘅通道，同時海防道目前已經有唔少金行同化妝品店，賣嘅嘢同廣東道差唔多。」

有代理話，海防道53至55號地下一個鄰近同樂道單邊嘅交吉地舖，面積約450方呎，租戶係專賣小食嘅龍津美食，租用上址十年後，由於業主加租至差唔多每月120萬元，較前租金升三倍，結果今年三月初唔再租。

本地連鎖甜品店許留山租用約十年嘅海防道31號地舖，亦喺今年三月中搬走，代理話，上址面積約750方呎，舊租每月約60萬元，業主意向月租加至約100萬元，有傳依家同街一間手袋專門店傾緊租，原因係佢哋依家租緊嘅地舖，畀間珠寶店以每月約180萬元洽預租，較現租金升1倍。

食肆呻皮費重寧放租

早喺二十年前已自置舖位嘅金湖粉麵茶餐廳負責人黃小姐話，「近年內地人帶旺海防道，佢哋舖頭依家食客中，內地人比例佔八成。雖然生意唔錯，但來貨價貴，員工薪金開支大，若果有人有意洽租都會考慮。」