市場徐想:現代教育 轉型再戰

Prof J成日都話教育及培訓係好好做,誰不知現代教育(01082)出通告,美其名「擴大」上市所得款項之用途,實際上係更改上市所得資金用途,用作投資非教育業務,差唔多5,000萬元。屈指一數上市集資1.5億元,扣除上市費用及償還貸款,實際所得只有8,000萬,將超過60%資金用作其他用途,又確實係幾誇張。

現代教育因為三三四加A level嘅過度期令補習收益增加而發盈喜,不過之後又因業務轉差而發盈警,Ken Sir可能感覺到補習教育行業上轉變,維持業務又唔係咁容易,計仔多多嘅佢梗係諗計劃轉型。

中國人話名不正則言不順,決定發通告舉行股東特別大會,其中一個議案,就係改名做「香港教育(國際)投資集團」。要改名,梗係要試水溫先,上年九月用咗2,000萬元買入聯夢活力(08100)一批可換股票據(CB)。教育相關投資只係得1,200萬元,而買入聯夢活力CB用咗2,000萬元。投資眼光實在係無得頂,點解?因為中期業績只賺434萬元,按年急跌58%,其中一筆2,000萬元嘅收入,就係來自呢批CB的帳面利潤。如果唔計呢筆收入,公司仲會錄得虧蝕。

盈利唔掂,Ken Sir惟有靠另外投資以增加利潤,某程度上係可以理解。但投資教育業務只得千幾萬元,重視程度真係可見一斑!似乎佢對從事教育業務呢團火又好似熄熄哋。改個靚名,從頭開始,喺唔同領域上大展拳腳。

港大電子金融服務榮譽助理教授 徐燦傑