期指攻略：後市未明以靜制動

周三提出三個理由，話港股即使唔跌，後市反彈唔慌惡得去邊。前日即刻見效，恒指早市以全日最高位22,527點開出，淡友明顯全日主動壓制，加上假期前成交萎縮，承接力薄弱，恒指於隨後一小時左右，已經返到周二22,300至22,400點的橫行交易區後，悶到收市，主板成交縮到522億元。

港股缺乏炒上動力

周三現貨高位22,527點，與三月二十七日高位22,529點僅一步之遙，好友把握隔晚美股強勢，在早段先確認即市高位，全日好「辦事」，完成即市足夠波幅後，（目及）住個市。

三月上旬，大市用短短七日時間，由23,262點跌落21,975點，跌掉1,287點，隨後反彈止於22,529點，足足十一個交易日，只係由低位回升逾500點，唔好話收復0.5反彈阻力22,618點有點勉強，連重返0.618阻力22,467點樓上收市，都未能成功做到，三月業績期過去，港股缺乏炒上動力，事實上，去年第四季升浪的火車頭國指，近日更率先回軟，由三月初高位11,562跌落10,713點，近日反彈亦受制於20日線，周三低見10,711點，比恒指早一步再破低位。

22,185點開嘅好倉，已按建議在周三早市平倉獲微利，外圍不明朗，周三晚美國私人企業就業數據麻麻，周四朝日本央行又確認買債推量寬，處身10日及20日線之間嘅港股，方向未明確，加埋又到周末假期，還是一動不如一靜。