Fundman睇市：富力地產 基金睇好

周三晚美股插水，事緣主要向私人企業職位進行統計的ADP Research Institute，指美國企業三月只增加15.8萬個職位，數字是去年十月以來最細，低過分析員預期的20萬下限，拖累隔晚道指跌111點，報14,550點。

市場預期聯儲局今、明兩年會陸續撤出貨幣寬鬆措施，在伯南克將量寬同失業率掛鈎之後，每個月就業數據都變成量寬退市溫度計，其實ADP數據有十幾萬個新增職位一啲都唔算差，只係同經濟師預期有些少落差。反映長期息口去向的十年美債孳息率，在數據公布之後跌到接近1.8厘水平，今晚官方嘅就業數據出籠，暫時大行估失業率維持7.7%不變，新增職位由二月的24.6萬份縮番些少至20萬份，開大開細都未知，今日港股復市相信會繼續靜局。

提防藥股快上快落

星期三外圍大升下，港股高開低收，恒指收市跌30點，報22,337點，睇番由三月中的低位22,000點樓下，反彈九日只係得區區三百幾點，再睇星期二、三沽空比例，升番去12.4%及12.5%，是去年八月底以來最高，可見港股明顯已淪為基金提款機。H7N9來犯，保健醫藥股表現標青，泰凌醫藥（01011）升17.6%，朗生醫藥（00503）及復旦張江（08231）都升約7%，不過，依家連傳染途徑同將來會唔會生產疫苗都仲未確定，炒作小心會快上快落。

內地多個城市的調控樓市「國五條」細則陸續曝光，暫時投行反應都認為招數無預期咁辣。內地媒體報道，北京非周末睇樓量比落實出招前仲多。事實上，唔少內房股一月初比大市更早見頂回落，累積足夠調整，近日趁「國五條」水落石出，炒番轉頭。

富力地產（02777）屬於比較強勢內房股，由三月中低位回升逾兩成，一來早前公布業績對辦，即使去年平均售價下滑，但藉着出色的成本控制，毛利率只係輕微由42.5%跌至42.2%之下，全年純利有13.6%增長，賺55.02億元人民幣。

近期唔少基金睇好富力，一來管理層對今年銷售目標訂得頗進取，目標銷售額420億元人民幣，意味會有近三成增長，其次係今年派息比率輕微低於四成，預留近百億元子彈以便在吸納土儲上大展拳腳，啱心水不妨留意。若嫌富力太過「大價」，差唔多故事的碧桂園（02007），都可以望多兩眼。