股海實戰：房託基金 避險之選

內地再傳有感染新禽流病毒死亡個案，假前見有沽唔切現貨嘅缸邊友急沽國期做定兩手準備。參考○九年四月底五月初香港確診首名H1N1豬流感患者，當時恒指已由首季低位11,3440點回升至15,000點樓上，而公布疫情當周恒指最多跌5%，之後就喺內地嘅「四萬億」刺激經濟措施持續發揮作用下一路向上，升到當年十一月高位喺23,000點水平。

再回看今時今日嘅H7N9禽流感，若然真係喺內地擴散，又或者喺香港有案例，假設港股跌半成即係落番21,000點邊，與周二阿莊話次季可開始分注入貨嘅水平相同，相信喺維持今年GDP增長目標7.5%嘅大前提下，年中開始政府又會出招谷內需，故亦唔排除今年股市走勢會係舊年翻版，即係旺年頭年尾，且耐心等候年中前後嘅執平貨機會。

石藥安心等食胡

阿莊持倉中嘅京能（00579）公布完業績後股價隨跌市向下，但本周一連兩個交易日守穩2.2元，本周三更反彈5.8%至2.35元，走勢比想像中強。此外，石藥（01093）表現亦唔錯，本周三A股疫苗醫藥股走高，石藥股價亦以全日高位3.47元收市，升4%。

唔知大家有冇發覺，石藥股價自今年初開始起步，近兩個月回吐成功考驗2.8元水平後股價持續反覆向上，相信原因係同公司市值突破10億美金（約78億港元）大關，唔少老外基金入場跟掃有關，睇走勢其市值好快挑戰百億元大關（現時市值為95億元），就等佢上到3.6至3.8元水平先至諗食胡。

呢期魚缸氣氛唔多好，選股宜重防守性。房地產信託基金置富（00778）同越秀房託（00405）都係唔錯嘅選擇。置富本周二、三股價兩度見過五十二周高6.98元，現價市盈率6.9倍，息率5.2厘。今年一、二月香港零售數字表現唔錯，相信政府增加住宅供應對其零售物業租金收入影響唔大。再參考今年一、二月都有基金喺6.7至6.8元水平增持，現價可作避險之選，中線目標見7.3至7.5元，回吐宜守6.75元。

越秀房託單位價格自上月中旬升穿4.1元後反覆向上，本周二、三股價亦曾高見4.43元，升勢某程度反映人仔升值下公司嘅內地租金收入水漲船高。公司派發末期息每單位0.1282元將於本月十五日除淨，現價息率達7.8厘，對好息之徒具吸引力，中線博上4.8元，順道收埋股息，支持區喺4.2元。