樓市出更：居屋「發水王」入巿睇真啲

免補價買居屋消息一出，即時撻着唔少上車客嘅入市情緒。不過原來居屋唔一定實用，部分都有「發水」。港島「居屋王」之一嘅筲箕灣東濤苑，有啲單位嘅實用率只得七成，比同區高實用率嘅愛蝶灣，實用率低咗9個百分點，實用面積計價後，東濤苑呎價即拉高四成，各位準買家入市前真係要睇真啲。

唔少人買居屋，除咗貪價錢平過私樓外，仲因為覺得佢間隔好用，同埋實用率亦相對地高。

東濤苑實呎貴四成

劉Sir比較咗各區嘅居屋屋苑，發現唔少實用率分分鐘低過私樓，好似東濤苑、沙田愉翠苑同馬鞍山錦泰苑等等，部分單位實用率低見七成。

港島「居屋王」之一嘅東濤苑D座，早排有個單位綠表賣咗600萬元，建築呎價高見6,300元一度榮登綠表居屋王。美聯黎泳傑話，依家屋苑綠表呎價都略見回軟，平均建築呎價約5,900元，至於鄰近嘅愛蝶灣，綠表呎價同樣約5,900元水平。

不過，比較兩屋苑單位嘅實用率，呎價差距即時拉闊。

好似東濤苑C座一個中高層1室，建築/實用面積約736/522方呎，實用率約71%，早前以綠表357萬元賣咗，建築呎價約4,851元，實用面積計價後，實用呎價增至約6,839元，急升四成一。

愛蝶灣相比更實惠

鄰近嘅愛蝶灣，不論樓齡、地點同交通上亦相差無幾，比較項目10座中層一個面積相若嘅G單位，建築/實用面積約693/592方呎，綠表成交價360萬元計，建築/實用呎價約5,195/6,081元，實用面積計價只係升咗17%。

上述兩個單位嘅呎價，原先以建築面積計，東濤苑平過愛蝶灣成7%，實用面積計價後，愛蝶灣實用呎價比東濤苑低11%。

事實上，較新落成嘅居屋屋苑，實用率比舊式嘅來得低，就好似○一年落成、以康和式設計嘅愉翠苑，部分單位實用率都只得七成，同私樓差不多。

睇番房委會提供嘅網上資料，原來愉翠苑建築面積由約732至936方呎，而實用面積只有約506至657方呎，粗略估計，呢個屋苑最大同最細單位，實用率都係只得69%同70%！心急入市嘅準買家，真係要細心選購。