Fundman睇市：理財產品 危機四伏

長假期間兩項內地數據出籠，官方中國製造業PMI，由二月的50.1升至三月的50.9，稍低於分析員估計的51.2，數字高過50代表製造業仍處擴張當中。不過全球獨弱的A股，上星期四就因為銀監規範商業銀行理財產品業務的消息，跌到去三個月低位，加上早前人行的正回購措施，唔少人相信a，內地收水趨勢已成。

○九年金融海嘯，美國推零息兼量寬刺激經濟，中國政府推4萬億基建托市，放水的負面影響逐漸浮現。當年措施製造一堆基建大白象工程未收科之外，多年來地方政府依賴的賣地收入，在樓市調控措施下被廢武功，地方政府財困導致資金鏈斷裂，反而俗稱影子銀行的非銀行體系融資，就發展得異常蓬勃。

事實上，就算人行睇銀行盤數睇得再緊都無用，近年私人及地方政府項目融資，唔少都繞道以理財產品形式賣出街，部分更直接經由銀行包裝並轉售給客戶，這類理財產品萬一出事，估計銀行好難置身事外，事實由於產品可以隱藏於資產負債表內，唔影響資本充足要求，因此唔少銀行自己都賭埋一份，有估計單係去年，內地就有7萬億人仔理財產品推出，可以想像，若然銀監再唔防患於未然，一旦爆起上嚟，引發嘅連鎖反應真係不堪設想。

人行收水加埋今次的嚴管理財產品，內地短期水緊在所難免，對早已唔跟外圍股市的中港魚缸有幾大衝擊，尚需時間觀察，不過就令史提芬想起主攻高息融資租賃的遠東宏信（03360），以其過往紀錄顯示，每逢內地銀行收水，這類高息融資生意都會進入高峰期。

遠東宏信收益穩增

集團上星期公布去年全年業績，賺2.41億美元，按年增長40.8%，略低於成預期，但年初大股東減持（中化集團目前持27.94%仍是第一大股東，減持股份大部分落入台灣國泰金控旗下國泰人壽，持股量9%），才是近日股價弱勢主因，自年初高位計算，累積調整了25%。但公司過去兩年盈利翻一番，市盈率回到合理的8.7倍水平，今明兩年平均增長估計亦唔難維持兩成以上，計落目前估值是頗吸引。上星期見業績後股價曾撻落4.95元，之後拗腰以5.13元收市，短期可能已經搵到支持，如果企穩5元樓上，配合內地水緊，私營融資有景的共識，不妨留意。