股海實戰：雅士利 可炒落後

長假前交易日A股大跌，內銀及內房成重災區，港股亦跟跌，但尾市跌幅收窄，成交增至737億元，表現又唔係想像咁差，究竟係季結因素使然，抑或有買盤趁低吸納，睇吓本周恒指能否守穩22,000點便知一二。

上周華晨（01114）股價急挫11%，主要係有傳媒引述管理層談及今年展望時話，預期今年寶馬銷售目標為廿萬輛，年增25%，增速比去年嘅49%放緩。華晨捱沽，連帶阿莊持有嘅新晨動力（01148）都一度跌穿招股價2.23元，收報2.24元，跌2%。既然新晨出咗業績股價都冇咩睇頭，短線反彈至2.3元邊會考慮先行沽出。

蒙牛隨時有突破

繼續睇吓業績股，蒙牛（02319）去年業績表現喺預期之內，阿莊相信，自中糧入主之後，蒙牛進行一系列整頓，相關效益將逐步展現，有助帶動公司盈利復甦。見到上周四大市受壓，但蒙牛股價逆市靠穩，收報22.3元，升1.3%，唔多唔少反映業績公布後市場反應正面，次季可以關注吓呢隻股票，畢竟過去大半年蒙牛股價一直喺20至24元水平上落。喺展望今年基本因素持續改善下，相信年內股價有力突破大型橫行區，22元樓下可分注中線收集。

另一隻乳品股雅士利（01230）上周亦派發成績表，去年純利增53%至4.68億元（人仔，下同），毛利率上升1.7個百分點至53.7%，現價往績市盈率15倍，息率5.3厘，數據唔差，加上派息比率由前年嘅65.3%增至85.4%，基金股東應該受落，但奇就奇在公布業績後股價偏軟，與同類股合生元（01112）近期股價迭創新高相比，顯得有點落後。

雅士利主要從事產銷嬰幼兒配方奶粉，品牌包括「雅士利」及「施恩」，公司主要透過進口優質乳品原材料，自主研發配方生產，現於廣東、山西、黑龍江等地設有工廠，喺新西蘭和鄭州嘅工廠目前正處於籌備和建設階段。由於內地消費者對海外奶源產品始終較有信心，故即使近期進口乳品原材料價格有上升趨勢，但相信公司有能力將成本升幅轉嫁消費者。

截至去年底，雅士利持有現金及等值及其他銀行存款合共29.91億元，去年經營業務現金流入7.72億元，加上手頭資金充裕，料今年可維持高派息政策。雖然，呢家公司唔係國有背景，民企身份估值唔多唔少都要計番啲風險溢價，但除此之外，睇營收、現金流、派息，以及業務前景，現價估值唔係貴，行業增長前景佳，值得留意。