樓市出更：將軍澳地價望見新高

將軍澳南係本港未來住宅供應重鎮，政府按季推出呢區地皮已經係「指定動作」，單計舊年批出嘅同區土地已經有7幅咁多，今個星期五再有一幅65C1區限量地截標。有測量師老友估計樓面呎價可以去到約5,000元，隨時創區內新高。劉Sir估計新地（00016）及會德豐地產等區內「地主」，一定唔會放過機會擴大版圖。

劉Sir知道，上述將軍澳第65C1區限量地今年初先獲城規會放寬地積比率，總樓面大約56.9萬方呎，住宅樓面佔約49.5萬方呎，提供單位唔可以少過655伙。

料值28.5億 每呎睇五千

老友高緯環球張翹楚話，雖然政府係咁出招打壓樓市，但其實近排賣地成績都唔係太差，最令人跌眼鏡都係上月中批出嘅何文田「百億地王」，所以覺得將軍澳限量地樓面呎價都有約5,000元。計番估值約莫28.5億元，係市場上限。

唔講唔知，其實將軍澳南咁多幅地呎價都未做過五千元，所以今次截標幅限量地要成為區內地王，劉Sir都唔覺得出奇。話畀大家知，過去三年幾將軍澳南一共批出共9幅地皮，除咗第一幅喺一○年二月由新地拍賣投得嘅將軍澳第66B區地皮，即係天晉一期現址，其餘8幅都由政府主動推售，成交樓面呎價介乎約3,810至4,929元。

古時有魏蜀吳三分天下，依家將軍澳南地盤勢力分布主要都係「三分天下」，其中新地係大地主，先後投得區內4幅地皮；而會德豐地產亦取得兩幅。至於嘉華國際（00173）就分別以獨資形式，同埋與信置（00083）合組財團先後投得兩幅。劉Sir相信上述財團會伺機擴大勢力範圍。

屯門住宅地皮規模細

至於同日截標仲有屯門虎地第52區住宅地，總樓面僅約13,660方呎，張翹楚話，地皮位置附近多馬路圍繞，但考慮到地盤規模細，樓面呎價都應該做到約4,500元。折合估值約6,147萬元，係市場估值上限。