股海實戰：聯通可跑贏同業

上周港股先跌後回穩，恒指喺22,000至22,100點水平整固，見到部分早前被大盤力沽嘅中資板塊有反彈，好似上周五光伏股交投活躍，累跌幅度甚大嘅興業太陽能（00750）單日彈升12%，成交逾億元，而表現一直強於大市嘅股份，就繼續走強，燃氣股係其中一個表現硬淨嘅板塊。潔淨能源股中，京能（00579）表現叫人喜出望外，上周五收報2.58元，升9%，本來阿莊都想落車，好在話守穩2.2元再坐一會，冇畀人震走！

反觀隻半新股新晨動力（01148）就好似上緊斜路咁，動力唔係幾夠，多次上到2.4元樓上就掉頭，日日炒十零格波幅，睇吓本周三業績前後可唔可以踩油向上。

本周市況料趨淡靜

展望本周，由於有季結因素，加上復活節長假期將至，料本周市況會進一步轉趨淡靜，恒指重要支持仍喺22,000至22,100點，向上初步阻力先睇10日線22,441點。

三大中資電訊股經已先後公布去年度成績表，基本上三者表現與市場預期偏差唔大。投行較關注嚟緊三大營運商對發展4G業務嘅資本承擔。正所謂「出得嚟行，預咗要還」，享受咗多年「獨大」優勢嘅中移（00941），嚟緊要承擔起發展國產TD制式4G網絡嘅重大任務，據講今年嘅預算支出按年增49%至1,900億元（人仔．下同），其中417億擬用於建設4G網絡基站，較市場預先估計嘅金額高出一倍有多！

至於中電信（00728），今年嘅資本開支預計為750億元，而聯通（00762）則按年跌兩成至800億元，其中聯通更明言，未來只會喺現有3G基礎上升級至國際4G制式，4G相關投資每年不逾100億元。可見嚟緊喺發展4G方面，相對而言，擔子誰重誰輕，一目了然。

再集中睇聯通，去年手機補貼佔3G服務收入比率由前年嘅17.7%下降至10.2%，數字令人鼓舞。此外，去年聯通嘅3G用戶ARPU為86.1元，高於中移嘅76元及中電信嘅72元，顯見最先喺內地推出iPhone產品嘅聯通，3G客戶質素較佳，且如今3G相關投資已過高峰，步入收成期。而高調表態堅持沿用國際4G制式，能為股價去除不明朗因素，相信阿爺強制所有營運商都要使用TD制式4G網絡嘅機會唔大。換言之，相比之下，聯想受惠3G業務蓬勃發展嘅前景清晰明朗，今年業績和股價均有望跑贏同業。