樓市出更：福榮街舖「開餐」啃貴租

近十年間深水埗福榮街近黃金電腦商場一段街舖，逐步轉型為特色地道食街。依家嗰度大約有60多個地舖，其中餐飲同食肆佔嘅比例已去到約三分之二，唔少食肆為咗唔流失熟客仔，都寧願捱貴租繼續經營，其中有間食店啱啱以每月約15萬元續租，呎租約150元，比起之前租金多咗超過66%，升幅直逼一線街舖。難怪有消息指，曾响銅鑼灣經營逾四十年嘅老牌粥粉麵家，都諗過落去搵位。

福榮街近黃金電腦商場一段街舖數目有60幾間，劉Sir知道，大部分舖頭都係食店，雖然佢哋唔係星級酒店食府，但都係特色食肆，數數埋埋，食店數目佔該段街道舖位達三分之二。

舖前可泊車 食肆必爭

香港置業方猶輝話，福榮街近黃金電腦商場一段，由於舖位前面馬路可以泊車，加上冇排檔遮擋舖面，所以食肆好樂意租用，依家嗰段街舖平均呎租要約110元，兩、三年間已升咗約40%。

福榮街已是食肆必爭之地，唔少舊租客都唔會輕易撤出。有代理爆料，福榮街一個單號地舖，租客賣東南亞食品已經四、五年，啱啱續租，月租約15萬元，呎租約150元，加幅超過66%，拍得住一線街舖升幅。

另外，該街道一個雙號地舖連閣樓，面積約1,200多方呎，食店約五年前以每月約7萬元租用，其後以每月約11萬元續租，早前續租租金升到約15萬元，兩度續租後，租金加幅累積超過1.1倍。

一舖難求 業主唔憂租

由於嗰段福榮街暫無吉舖，業主都唔憂租，其中一個由非食店租用約二十年嘅雙號地舖連閣樓，無人知道依家月租幾多，但業主放緊租，意向月租約14萬元。有喺區內售賣豬膶麵達約半世紀嘅店舖負責人陳先生話：「十年前嘅福榮街食店數目冇咁多，現時呢間麵檔喺條街有3間分店，由於生意來源唔少來自熟客，好難轉去其他地方，若業主加租輕手啲，都會繼續租用。」

喺福榮街經營髮型屋嘅劉先生話：「喺福榮街間地舖剛續租，新月租約莫4萬元，比起前租升約三成，升幅唔算高，可能因為舖位冇「後欄」，所以食店唔吼，否則加幅最少一倍。」另經常去深水埗嘅梁先生話，「近幾年嗰段街食店味道差咗，可能租貴，將貨就價。」