股海實戰：康師傅 毋須睇太淡

魚缸同天氣一樣烏雲密布，即使A股回穩，最終恒指還是倒跌收場。每次大家信心跌落低谷嘅時候，都係實力投資者入市作長線吸納嘅時機。阿莊相信，嚟緊三個月會係繼去年次季後另一個中長線入市嘅好機會，現時若持貨不多，最重要係保留實力，靜觀其變，耐心等候人棄我取嘅機會。

兩會前後中資股好似由天堂落入地獄，光伏股嘅復甦故事消失，另鐵道部併入交通部，亦令外界對未來內地鐵路業發展產生疑慮。要知道政企分家後，日後要投資，首要除咗有冇實際需要，仲要講效益，亦不排除成本上升要轉嫁消費者。

阿莊相信，產業改革嘅不明朗因素將一段時間困擾鐵路相關股份。中國南車（01766）及南車時代（03898）將於下周四公布業績，前者股價已跌穿250日線，後者則暫時險守其上，且留意業績會否講及公司因應行業改革嘅最新發展策略。

新晨貨源入強者手

阿莊話周內擬沽出嘅京能（00579），呢兩日表現又似乎比想像中好，尋日收報2.3元，升1.32%，公司將於下周三宣布業績，此前不跌穿2.2元暫且繼續持有，否則會先行沽出獲利。周一見報提過嘅新晨（01148）表現亦唔差，上周五踢上2.4元樓上，周一調整一日，尋日又再重上2.4元，顯示貨源盡入強者手，今日喺2.4元樓下會睇位上車，向上初步阻力喺2.8元，跌穿招股價2.23元止蝕。

康師傅（00322）去年毛利率上升3.36個百分點至29.9%，但純利按年僅增8%至4.55億美元，略低於市場預期，主要係第四季表現遜色，故見業績公布後股價沽壓未消，尋日低位見19.26元，收報19.28元，跌3.4。綜觀大行報告，大摩及里昂都調低其目標價，至分別為18.9元及17.53元，現價與之距離喺一成之內。

再睇技術上，現時14日RSI回落至27，對上一次低位喺去年五月底，股價低見17.9元，14日RSI低見23，之後股價便見底回揚，去年十月見高位25元。

阿莊相信，首季至次季初康師傅股價跌浪，會係中長線投資者分段吸納嘅時機，事關今年春節較去年遲，今年首季經營數字料可勝去年同期，且年內餘下時間，公司致力整合與百事中國嘅資源，通過生產基地與供應鏈嘅整合以降低成本，效益將會逐步展現，前景實毋須過於看淡。